6 BEHEERMAATREËLS
Vir die toetse is die volgende beheermaatreëls ingestel:
• 'n Kontroleband (Goodyear se Wrangler HP All Weather) is gebruik op 'n kontrolevoertuig ('n Toyota Hilux) met soortgelyke spesifikasie as ons toetsvoertuig.
• 'n HP-bandspesifikasie (soortgelyk aan Highway-Terrain) is spesifiek gekies sodat geen AT-band 'n voordeel sou hê nie.
• Kontrolelopies is voor elke toets gedoen om 'n verwysingspunt te bepaal en tussen toetse herhaal om dit te bevestig.
• Vir die teertoets is elke stel bande voor die tyd warm gery en 'n oefenstop gedoen om die bandtemperatuur te verhoog. Die banddruk is daarna weer nagegaan.
• Minstens drie lopies per toets per band is toegelaat. Indien 'n lopie nie verteenwoordigend was nie (bv. as te vroeg of te laat gerem is, of die wegspring nie reg was nie) is tot twee ekstra lopies toegelaat.
• Die beste en swakste tye van al die lopies is uitgegooi, en die gemidddeld van drie lopies is aangeteken.
• Die baan vir die grondpad-remtoets is voor elke toets gevee en die verskillende bane is voortdurend in stand gehou.
• Banddruk is voor elke toets op die kontrole-, sowel as die toetsvoertuig, bevestig.
• Verteenwoordigers van al die bande-verskaffers is genooi om die toetse mee te maak. Hulle kon ook appelleer as hulle ongerymdhede waarneem.
• 'n Tegniese komitee, bestaande uit ' n verteenwoordiger van Klipbokkop en WegRy, asook drie bandevervaardigers, is daagliks gekies om enige probleem op te los. Die komitee se besluite was finaal.
• Verteenwoordigers van die Suid-Afrikaanse Bandevervaardigerskonferensie en die Bande-invoerdersvereniging van SA is as onafhanklike waarnemers genooi. >