Bosbrekers en lugsakke
As jy ’n bosbreker op jou ryding installeer, kan dit ’n invloed op jou voertuig se lugsakstelsel hê, sê
Lugsakke is ontwerp om ’n voertuig se insittendes in ’n botsing te beskerm deur ’n kussing tussen die insittendes en dele van die voertuig – soos die instrumentepaneel, stuurwiel en deure – te vorm. Dit werk sáám met jou veiligheidsgordel. As jy nie vasgegordel is nie en deur die ruit vlieg, gaan jou lugsakke jou nie veel help nie. Daarom die afkorting SRS ( supplementary restraint system).
Dis belangrik dat enige namarkbosbreker (sogenaamde
aftermarket- produkte) nie dié lewensbelangrike funksie nadelig beïnvloed nie.
Die ontplooiing van die lugsakke word deur ’n elektroniese lugsakbeheereenheid ( ofte
wel Airbag Control Unit) bepaal. Dié beheereenheid kry inligting van verskeie motorkomponente, soos die bots-, remdruk- en wielspoedsensors. Na gelang van die inligting wat die beheereenheid ontvang, sal dit die lugsakke laat ontplooi.
In ’n ongeluk reg van voor is die versnellingsmeter die sensor wat veral deur ’n namarkbosbreker geraak sal word. Hierdie sensors word gewoonlik naby die voorkant van die voertuig geïnstalleer en meet die spoed van versnelling, of, soos in die geval van ’n botsing, die tempo van spoedvermindering.
Moderne 4x4’s het ’n baie spesifieke neusontwerp, wat die fabrieksbosbreker of -buffer insluit. Die ontwerp en materiale wat gebruik word, sal bepaal waar die neus frommel tydens ’n ongeluk, en dus ook wat die tempo van die spoedvermindering tydens ’n botsing is. Die lugsaksensors is geprogrammeer om dit akkuraat te meet en die inligting aan die lugsakbeheereenheid deur te gee, sodat die lugsakke ontplooi kan word, al dan nie.
Hier is die probleem:
Die lugsakbeheereenheid van ’n 4x4-voertuig is dalk geprogrammeer om nie te ontplooi tydens ’n botsing teen minder as 40 km/h nie.
As jy die voertuig se oorspronklike bosbreker met ’n staalbosbreker vervang, verander jy die frommelsone aan die voorkant van jou voertuig. Dan kan jou motor moontlik teen ’n ander tempo van spoed verminder tydens ’n ongeluk.
Teen ’n spoed van 38 km/h, byvoorbeeld, sal ’n voertuig wat met ’n onversoenbare bosbreker toegerus is, moontlik vinniger van spoed verminder weens die nuwe ontwerp.
Die lugsaksensors kan dan weens die hoër tempo van spoedvermindering die werklike impakspoed verkeerd bereken. Jou lugsaksensors sal daarom “dink” jy is in ’n ongeluk teen ’n hoër spoed as die 40 km/hdrumpel betrokke en daarom die lugsakke ontplooi.
Dit kos meer as net ’n paar rand om jou lugsakke te vervang, om nie eens te praat van die skade wat dit aan jou instrumentepaneel en stuurwiel kan aanrig nie. Jy wil daarom nie jou lugsakke onnodig laat ontplooi nie.
Sommige versekeraars weier om eise uit te betaal as hulle vind die lugsakke het voortydig ontplooi omdat die voertuig met ’n verkeerde soort bosbreker toegerus is. Lugsakke ontplooi met redelik baie krag, en hoewel hulle daar is om jou in ’n ernstige ongeluk te beskerm, het hulle ook al insittendes beseer. As jy ’n gesertifiseerde, goedgekeurde bosbreker aanbring, kan jy nie net ’n paar rand spaar nie, maar ook moontlike beserings voorkom.