SPORTNUTSVOERTUIG VAN DIE JAAR
Ford Everest XLT
Toyota se Fortuner kraai al lank koning in hierdie segment met verkope wat deur die jare maandeliks gereeld die 1 000-syfer oortref het. En met rede, want nie net is dit ’n puik pakket nie, maar dit was vir lank ook ’n ryding wat geen teenstanders gehad het nie. En selfs al het daar mettertyd waardige mededingers soos die Mitsubishi Pajero Sport en Chevrolet Trailblazer tot die mark toegetree, kon geen van hulle regtig die Fortuner se posisie onder SuidAfrikaanse kopers bedreig nie. Dit wys jou hoe sterk handelsmerklojaliteit is.
Toe ons verlede jaar die Mitsubishi Pajero Sport 2.5 Di-D as die Sportnutsvoertuig van die Jaar aangewys het (en ’n paar mense in hulle bier verstik het), het ons voorspel dat die nuwe Ford Everest dinge in dié kategorie gaan omkrap ( WegRy #77). En dit het toe gebeur.
Die Everest is ’n groot verbetering op die vorige model, wat nie net ’n lelike eend was nie, maar ook ’n primitiewe onderstel met bladvere agterlangs gehad het.
Die nuwe Ford Everest het egter tegnologies ’n groot sprong vorentoe gegee en sommer ook sy kuif gekam.
Dit volg die standaardresep van heeltydse vierwielaandrywing, ’n agterste ewenaarslot en ’n laestrek-ratkas. Maar ’n nuwe TerrainManagementveldrybeheerstelsel, soortgelyk aan dié in die Discovery Sport, laat jou met die draai van ’n knop tussen ry-modusse vir oppervlaktes soos klip, sand en modder kies. Die stelsel is ook ’n eerste in die Everest se segment.
Ander eienskappe sluit in grondvryhoogte van 225 mm, outomatiese afdraandremming, ’n opdraande-wegtrekhulp en ’n klasleidende dompeldiepte van 800 mm – nou’t jy mos ’n taai én slim 4x4.
Ons is wel skepties oor die 18 duim-bande op die XLT (20 duim op die luukser Limited). Dié vellinggrootte is nie ideaal in sand nie en is kwesbaar vir skerp klippe. Dit kan jou ook in die verknorsing los as jy ’n band ver van jou plaaslike SupaQuick verloor.
Die Everest het ’n luukse kajuit en soos die Ranger is kragstuur nou ook elektronies, in plaas van hidroulies. Die kajuit is besonder stil danksy ’n stelsel wat geraas optel en dit met klankgolwe uitkanselleer, terwyl die derde ry sitplekke heeltemal in die vloer kan wegvou. Boonop is sy instrumentasie en raakskerm ongetwyfeld die beste in sy klas.
Die Everest het dieselfde 3,2 liter-Duratorq-enjin as die Ranger. Sy kraglewering van 147 kW is die beste in sy klas en die wringkragsyfer (470 Nm) die tweede beste (die Chevrolet Trailblazer se 2,8 Duramaxenjin lewer 500 Nm wringkrag).
Van al die bakkie-gebaseerde sportnutsvoertuie in sy segment het die Everest dus die beste balans tussen krag en rygerief, weelde en veldryvermoëns. Daarom is hy ons Sportnutsvoertuig van die Jaar.
Die nuwe Everest het tegnologies n groot sprong vorentoe gegee en sommer ook sy kuif gekam.”