EKSPEDISIE-4X4 VAN DIE JAAR
Toyota Land Cruiser 76 Series V8-turbodiesel
In 1984, ’n volle 31 jaar gelede, het ’n paar dinge gebeur. Bruce Springsteen het sy album BornintheUSA bekend gestel, Zola Budd en Mary Decker het tydens die 3 000 m-finaal van die Los Angeles Olimpiese Spele in mekaar vasgehardloop – en Toyota se Land Cruiser 70-reeks het op die mark verskyn.
Sedertdien het hy nog bitter min verander. Ja, hy’t kronkelvere op die voorste as gekry, sy neus is ’n bietjie opgeknap en die instrumentasie het nou satellietnavigasie. Maar die onderstel en basiese resep van ’n baie taai leerraamonderstel met twee vaste asse het onveranderd gebly. En met goeie rede, want dit wérk.
Weens streng regulasies in Europa en Amerika kan jy nie ’n 70-reeks Land Cruiser daar koop nie. Maar Toyota verkoop soveel van hierdie rygoed in Afrika, Asië, Australië en Suid-Amerika dat dit nog steeds lonend is om hom te bou. Dit sluit in myne, weermagte (en rebellegroepe), konstruksiemaatskappye, boere en 4x4-ryers wat hulle met groot entoesiasme inspan.
Trouens, jy kan vir enige groep 4x4-kenners vra watter voertuig hulle sal kies as hulle lewe sal afhang van ’n suksesvolle Kaap-na-Kaïro-rit, en 99% van hulle antwoord “’n Land Cruiser”.
Tot so twee jaar gelede was die 4,2 liter1HZ-enjin al dieselopsie in die 70-reeks. Ja, hy’s baie betroubaar en kan op Frisco-kitskoffie en country-musiek loop as dit moet, maar jislaaik, daai 96 kW en 285 Nm laat niemand in vervoering nie.
En dis waar die 4,5 liter-1VD-FTVV8-turbodiesel met sy 151 kW en 430 Nm in die prentjie kom. Want skielik het jy ’n haas onkeerbare 4x4-stasiewa met vaste asse, twee ewenaarslotte én ’n enjin wat dit moontlik maak om heeldag moeiteloos teen 140 km/h aan te suiker as die pad (of gebrek aan spietkops) dit toelaat.
Sy grootste mededingers is die Nissan Patrol en Mercedes-Benz G300 CDI Professional, maar die Patrol het net ’n dors 4,8 liter-petrol en ’n pap 3,0 liter-turbodiesel, terwyl die Merc baie naby aan R1miljoen is. Vir sy prys van R661 100 is daar geen voertuig in die wêreld wat hom as ekspedisievoertuig kan ore aansit nie. – Jaco Kirsten