BEKWAAMSTE 4X4 VAN DIE JAAR
Jeep Wrangler Rubicon Unlimited
Daar is twee soorte 4x4-liefhebbers: Diegene wat weet hoe goed ’n Jeep Wrangler Rubicon in rowwe terrein vaar – en dié wat dit nog moet uitvind.
Die resep is eenvoudig: Vat ’n ryding met ’n kragtige 3,6 liter-V6-petrolenjin, leerraamonderstel, vaste asse en twee ewenaarslotte – en staan terug. O ja, en dan is daar nóg ’n partytjietruuk in die vorm van die teenkantelstawe van die voorste as wat jy met die druk van ’n knoppie ontkoppel om indrukwekkende wielartikulasie moontlik te maak.
Vir die meeste veldry-toepassings werk ’n dieselenjin baie goed, maar turbodiesels ontwikkel hulle piekwringkrag eers teen ’n sekere enjinsnelheid – hier vanaf 1 800 – 2 000 r/min.
Kragtige petrolenjins (die Rubicon s’n ontwikkel 209 kW en 353 Nm) het egter die voordeel van geen turbo-traagheid nie en dat hulle krag- en wringkraglewering baie liniêr is. Jy het dus teen luiersnelheid reeds bruikbare wringkrag wat soomloos toeneem terwyl jy die versneller geleidelik dieper trap.
Die Wrangler is ook ’n bewys van presies hoe Land Rover die bus met hulle Defender verpas het.
Die Defender het vanjaar die einde van sy leeftyd bereik omdat Land Rover verseg het om hom bietjies-bietjies te verbeter – totdat strenger Europese veiligheidsvereistes beteken het dat hy nie meer daar verkoop kon word nie. In Amerika mag hy al sedert 1993 nie meer verkoop word nie.
Met die Wrangler het Jeep nie net daarin geslaag om met elke nuwe generasie iets te skep wat meer modern en gerieflik as sy voorganger is nie, maar wat steeds net so goed – of beter – in die veld was. Hoeveel ander vervaardigers kan dit sê?
Tekortkominge? Pakplek agterlangs is min, en teen 120 km/h is daar redelik windgeraas. Maar die binneruim is modern genoeg dat jy hom dit kan vergewe. Want dit is immers ’n baie hardebaardveldryer.
Die nuwe Wrangler gaan eers in 2017 onthul word en volgens Mark Allen, Jeep se ontwerphoof, gaan dit steeds vaste asse hê. Maar Jeep-aanhangers gaan twee nuwighede hê: ’n 3,0 liter-diesel sowel as ’n dubbelkajuit-Wrangler.
Tot dan gaan die huidige Wrangler steeds die septer swaai as die mees bekwame (of is dit onkeerbare?) 4x4 wat geld kan koop. Want nes met die Land Cruiser, is die Wrangler die versinnebeelding van “oud, maar nog nie koud”. –