FOTOGRAFIE-RUBRIEK
5 wenke vir skerper fokus
1 LOER OP DIE LENS
Kameralense het ’n verstelling vir “autofocus” (A/AF) en “manualfocus” (M/MF). In MF moet jy self die fokusring draai om op jou onderwerp te fokus, in AF doen die kamera dit self. Maak seker jou kamera is op AF.
2 GEE KANS
Wanneer jou lens op AF gestel is, moet jy ook “autofocus” op die kamera kies. Vir stilstaande onderwerpe, maak seker die kamera fokus eenmalig op die onderwerp en “lock” die fokus op daardie punt. Op Canon-DSLR-kameras staan dit as OneShot bekend en by Nikon as AF-S. Vir bewegende onderwerpe moet die kamera deurgaans op die onderwerp fokus terwyl dit beweeg. Hierdie verstelling staan bekend as Continuous AutoFocusMode of AIServo vir Canon-gebruikers en AF-C vir Nikon-gebruikers.
As jy die verkeerde fokusmodus in die verkeerde omstandighede gebruik, kan die foto effens uit fokus wees. Kyk byvoorbeeld na hierdie woelige luiperdwelpie: Foto A is uit fokus, want ek het ’n bewegende onderwerp in One Shot/AF-S geneem, maar foto B is geskiet op AIServo/AF-C.
3 GEE LIG
Dis baie moeilik om op ’n donker onderwerp te fokus. Verlig dus jou onderwerp snags met ’n kollig of eksterne kameraflits.
4 HAAL DIE FILTER AF
UV-filters beskerm wel jou lens, maar sommige filters kan foto’s effens sag laat lyk. Toets jou toerusting met en sonder die UV-filter en kyk of dit ’n verskil maak aan jou fotoskerpheid.
5 KIES DIE REGTE SLUITERSPOED
Stel ook jou sluiterspoed om “camerashake” te voorkom.
Maak seker jou sluiterspoedwaarde is 1 oor die fokale lengte wat jy gebruik. As jy ’n 100-400 mm-lens gebruik en tot op 400 mm inzoem, moet jou sluiterspoed minstens 1/400 sekondes wees. Jy kan jou sluiterspoed verhoog deur van AutomaticMode na Program Mode (P) oor te skakel en die ISO-waarde effens te verhoog, bv. van 100 na 400 of 800.
Daar’s min dinge wat ’n dierefotograaf so frustreer soos foto’s wat uit fokus is. Hou hierdie vyf goed in gedagte en jou foto’s behoort skerper as die beeld van ’n Swarovski-verkyker te wees.