WEELDE-4X4 VAN DIE JAAR
Volvo XC90
Daar is ’n paar goed wat die Swede verstaan. Een daarvan is saunas. Die ander is voertuigveiligheid en hoe om ’n sportnutsvoertuig (SNV) so luuks soos ’n vyfsterhotelkamer te maak.
By die bekendstelling van die Volvo XC90 het die maatskappy egter nie gespog dat hy die mees luukse binneruim, kragtigste enjin of gemaklikste rit bied nie. (Hoewel dit alles op die standaard is wat jy van ’n voertuig verwag wat naby aan R1 miljoen kos.) Volvo se groot fokus was op die XC90 se veiligheidseienskappe, danksy sy IntelliSafe
tegnologie.
Behalwe vir aanpasbare snelheidsbeheer en ’n truratkamera (teen dié tyd al amper standaard in luukse sportnutsvoertuie), hou radar en kameras voortdurend die pad voor jou, langs jou en agter jou dop vir ander verkeer. Die blikbrein monitor selfs die sypaadjie vir voetgangers. Dit sal jou waarsku en help om remme aan te slaan as iemand voor jou instap of ’n ander motor voor jou beland.
Indien die byna onmoontlike gebeur en ál die stelsels jou in die steek laat, is daar ’n
SafePositioning- stelsel wat die sitplekgordels outomaties styfspan om beserings in ’n ongeluk te voorkom. Die sitplekke is spesiaal ontwerp om impak te absorbeer.
In so ’n groot SNV verwag ’n mens ’n enjin wat baie petrol of diesel gebruik, maar hier het die Swede ook ’n kishou geslaan. Die petrolopsies, ’n T5 met een turboaanjaer en T6 met twee, ontwikkel onderskeidelik 187 kW en 350 Nm en 235 kW en 400 Nm.
Die dieselenjins het een turboaanjaer in die D4 en twee in die D5. Die D4 ontwikkel 140 kW en 400 Nm, terwyl die D5 165 kW en 470 Nm lewer. Daar is eintlik baie min aan hierdie wa wat sal teleurstel en dus is dit ’n maklike toekenning om te maak. As jy op soek is na ’n luukse SNV, gaan jy hard soek om een te kry wat vir jou beter waarde en veiligheidseienskappe as die Volvo XC90 gee.