FOTOGRAFIE-RUBRIEK

Tyd vir ’n nuwe kamera?

Hier’s ’n paar antwoorde.

NIKON VS. CANON?

As ek ’n baksteen gekry het vir elke keer wat iemand my vra: “Wat’s die beste kamera, Nikon of Canon?” het ek nou al ’n dubbelverdiepinghuis gebou! As jy gedink het ’n Toyota versus Land Rovergesprek kan hittig raak, begin ’n gesprek oor Nikon versus Canon op ’n fotografiesafari en kyk hoe die vonke spat.

Maar maak dit regtig saak of jy ’n Nikon of ’n Canon koop? As jy my vra, nee. Solank jy net een van die twee koop. As dit by tegnologie, boukwaliteit en gebruikersvriendelikheid kom, is albei van hulle puik. Dis belangriker dat jy die regte model kamera koop, m.a.w. een wat reg is vir jou fotografiese doelwitte én jou begroting.

TWEEDEHANDS VS. NUUT?

Ek is skrikkerig vir tweedehandse toerusting, nie omdat ek bang is dit gaan breek nie, maar omdat ek geneig is om swak foto’s wat ek daarmee neem op die toerusting te blameer. Met nuwe toerusting kan jy net jouself blameer.

As jy sterker is as ek, koop tweedehandse toerusting deur ’n maatskappy met ’n goeie reputasie. Gaan loer op Outdoorphoto se webwerf (www.outdoorphoto.co.za) en klik op “Used Gear”. Die beste kopies is toerusting wat op die rak beland wanneer iemand opgradeer.

WAT VAN ’N GOPRO?

In my opinie kan jy nie jou kamera met ’n GoPro vervang nie. ’n GoPro is wonderlik om unieke videomateriaal en ’n interessante kiekie hier en daar te neem.

Maar dit kan nooit die rol van ’n DSLRkamera vul nie, veral nie met dierefoto’s nie.

KAMERA VS. LENS

Wat is belangriker, die kamera of die lens wat jy daarop monteer? Albei! As jy ’n relatiewe goedkoop lens (soos ’n Canon EF 75-300 mm f/4-f5.6) op ’n professionele kamera (soos ’n Canon 5D MkIII) sit, verloor jy die waarde van die kamera se kragtige verstellings en fokusvermoë weens die lens se tekortkominge. Terselfdertyd sal ’n relatiewe goedkoop kamera, soos ’n Nikon D3200, nie ’n professionele lens soos ’n Nikon 300 mm f/2.8 AF-S tot sy reg laat kom nie. Spaar dus liewer genoeg geld om ’n goeie kombinasie te koop.

Vir natuurfotografie kan ek die volgende kombinasies aanbeveel:

Begroting onder R10 000: Koop ’n sogenaamde bridge- kamera, soos die Canon Powershot SX60 HS (±R5 700) in plaas van ’n intreevlak DSLR soos ’n Canon 1200D of Nikon D3200. As jy regtig ’n DSLR wil hê, spaar langer en koop beter kwaliteit.

Begroting onder R25 000: ’n Goeie opsie vir ernstiger amateur-wildfotograwe is die Nikon D5300 (±R10 300) en Sigma 150-600 mm f/5-6.3-lens (±R13 800) of Tamron se 150-600 mm f/5-6.3-lens (±R13 500). Met hierdie kombinasie sal jy uiteindelik die raampie kan vul wanneer jy troupante en neushoringvoëls afneem.

Begroting bo R25 000: As jy jouself kan bederf, beveel ek die volgende kombinasie sterk aan: ’n Canon 7D MkII (±R18 200) en Canon 100-400 mm f/4.5-5.6 L IS II-lens (±R23 800). Met hierdie kombinasie sal jy die pro’s ’n go kan gee!