Hoe gemaak as jy nie kan stort nie?
PIETER OOSTHUIZEN
BAKKIE-UITKLOPTOETS, BL. 22 Pieter sê hy was “nog net” in 20 Afrika-lande. Hy het al ’n rits ekspedisies en safari’s voltooi, dikwels as logistieke bestuurder, op roetes van 5 000 tot 8 000 km. Vandeesmaand gooi hy ’n stuiwer in die armbeurs in die bakkietoets.
Wat is jou eerste toerherinnering? In my pa se wit Valiant, gehaak voor ’n swaar, tuisgemaakte sleepwa. Ons het van Alexanderbaai gereis na wat gevoel het soos die ander kant van die planeet – die Victoria-waterval.
Jou gunstelingplek in die bos? Enige plek in Afrika se miombobosveld, waar die naguiltjie ( nightjar) jou aan die slaap sus.
Wat is die beste reiswenk wat jy ooit gekry het? Hou altyd ’n ekstra jerrykan vol skoon drinkwater op toer, vir iemand wat siek word of wanneer iemand anders jou hulp benodig.
Toer jy blindelings, of beplan jy? Beplanning is een van die lekkerste dele van ’n reis, solank jy dit nie oordoen nie. As mense saamgaan, is ek noukeurig. Op my eie is ek buigsaam, al dink ek twee keer oor elke tree.
Watter plek in Suid(er)-Afrika wil jy graag besoek? Die Kaokoveld, voordat ook dit deur konsessies hokgeslaan word!
Marinda Louw Coetzee
STOFPADSTORIES, BL. 93. Marinda is mal oor kos. Sy het vir ons ’n humorrubriek geskryf oor ’n onlangse vakansie toe dié basiese behoefte heelwat meer van ’n uitdaging geword het as wat dit moet wees.
Wat is jou eerste toerherinnering? Ons gesin het elke jaar in Swakop by my ouma se huis gaan kuier, gaan visvang en dan Etosha toe gery. Ek onthou die reusagtige kraaineste wat ek met my visstokkie gemaak het en ook die dik snye Outjo-brood met botter en biltong by die watergate in Etosha terwyl ons diere kyk.
Jou gunstelingplek in die bos? As jy in die nag by ’n plek aankom en dit eers die volgende oggend behoorlik sien wanneer jy wakker word. Daai is lekker. Soos die kampplek in Khaudum Nasionale Park in Namibië.
Wat is die beste reiswenk wat jy ooit gekry het? Van my ma: Gooi babapoeier as jy nie kan stort nie.
Toer jy blindelings, of beplan jy? Ek beplan roetes en begrotings, maar los gewoonlik tyd vir ekstra afdraaipaaie en foto-stoppe.
Watter plek in Suid(er)-Afrika wil jy graag besoek? Ek sou graag die rietdansseremonie in Swaziland wou sien en ook ’n draai ry in die Nasionale Bergkwaggapark naby Cradock.