Gevolgtrekking
Jis, hier moet ’n man fyn trap. Iemand skryf mos hoeka onlangs op WegRy se Facebook- blad: “Jaco Kirsten het vasgehaak by Toyota en glo daar is niks beter nie.” Eina! Veral omdat ek ’n gemodifiseerde Nissan Navara ry. Maar laat ons nie feite met ’n goeie sessie verwyt laat inmeng nie, of hoe?
Hoe jy ’n voertuig beoordeel, gaan in ’n groot mate afhang van wat jy daarmee wil doen. Anders as vir baie ander publikasies is ons taak eintlik maklik, want ons beoordeel rygoed soos dié grootliks aan hulle veldryvermoëns vir die deursnee-4x4entoesias. Vandaar die feit dat ons die enigste publikasie in Suid-Afrika is wat tot dusver hierdie groep voertuie op hierdie manier getoets het.
Goed, hier is my antwoord: Al vier hierdie bakkies het ’n paar modifikasies nodig voordat jy ernstig met hulle in die veld kan ry, beginnende by behoorlike bande, vering en praktiese goed soos bosbrekers voor en agter. Daarna kan jy self besluit wat vir jou noodsaaklik is. Dalk is dit ’n Bulls-bufferplakker of ’n braairooster op die dak.
As jy slegs praat van tegniese veldry, is die Amarok waarskynlik die minder aanloklike keuse, hoofsaaklik vanweë sy gebrek aan ’n laestrekratkas. Ja, jy kan in werklik tegniese toestande meestal om hierdie tekortkoming werk. Maar ons beoordeel hierdie voertuie as veldryers. As jy ’n fantastiese dubbelkajuitbakkie soek waarmee jy nou en dan 4x4-werk wil doen, sal ek die Amarok baie sterk oorweeg. Hulle is gemaklik, hiper-betroubaar en het lag-lag die beste brandstofverbruik van al die dubbelkajuitbakkies.
Die Isuzu laat jou dink aan ’n Curriebekerspeler wat nooit goed genoeg vir die Springbokspan sal wees nie, maak nie saak hoe goeie ou hy is, hoe baie Huisgenoot van hom hou of hoe hard hy probeer nie. Dis ’n goeie bakkie, maar sy tegnologie en afwerking – veral gesien in die lig van sy prys – is so vyf jaar agter die kurwe.
Wat ons laat met die Ranger en Hilux. Dis baie moeilik om ’n “wenner” aan te wys, want hulle kan amper alles min of meer ewe goed doen. Tydens ons versnelen klimtoetse het ons gevind dat hulle verskille in enjinkrag eintlik van akademiese belang is. Altwee is bekwaam in die veld. Altwee se binneruime is modern en altwee hanteer goed op teerpad.
Die Ranger is egter beter toegerus vir die prys. Hoewel die Hilux R20 000 goedkoper as die Ranger is, sluit dit nie goed soos leersitplekke, parkeersensors en ’n sleepstang in nie. Sit dit by, dan is hy duurder as die Ranger. Die Ranger is binne beter afgewerk met hoër spesifikasievlakke. Dis vir my ’n mooier ontwerp as die Hilux, veral wat die neus betref. Dan hanteer hy ook beter op grondpad en het hy in die algemeen ’n beter rit.
Is die Hilux dan ’n “verloorder”? Allermins. Ek is regtig beïndruk met die 2.8 GD-6-enjin. Ek het ook gesien hoe goed die bakkie lyk met ’n Iron Man-buffer. Dan is daai effense overbite voor reggestel.
Jy het boonop ’n wye handelaarsnetwerk en ’n waarborg dat jou herverkoopwaarde astronomies goed gaan wees.
Maar as jy wil weet of die nuwe Hilux die Ranger verbygesteek het as totale pakket, is die antwoord “nee”. Dit sê nie noodwendig iets sleg van die Hilux nie. Dit vertel vir ons eerder hoe goed die moderne dubbelkajuitbakkie geword het.