Die ander menings
PIETER OOSTHUIZEN
Nie een bakkie het regtig teleurgestel nie. Die Hilux het met sy klimwerk teen steiltes, grondpad-gedrag en keuse tussen ekonomie en krag beïndruk, maar daar is niks subtiel aan sy klaende afdraandremhulp nie. Die Ranger se afgeronde veelsydigheid in alle toestande was die opvallendste, terwyl die luukse Amarok en amper minimalistiese Isuzu steeds goeie vlagskepe is.
As ’n titel-boksgeveg gelykop eindig, behou die kampioen sy kroon. Só was dit met WegRy se soektog na die beste outomatiese 4x4-dubbelkajut, waarin die nuwe Hilux nie beter as die Ranger was nie. Maar die Hilux ding nou op gelyke voet met die Ford mee.
CHARLES THOMPSON
Die nuwe 2.8 GD-6 enjin is ’n ander perd as sy voorganger, die 3.0 D-4D. Dit ontwikkel 130 kW, basies dieselfde as die Amarok en die KB, maar teen 450 Nm het dit meer wringkrag, en dis net die Ranger se 470 Nm wat dit troef.
Binnelangs het die Hilux nou saam met die Ranger van die jongste tegnologie, maar wat ritgehalte betref, is hy steeds nie heeltemal so goed soos die Amarok of die Ranger nie.
Is hy dus ’n beter bakkie as die Ranger? Nee. Maar dis ’n groot verbetering wat in alle opsigte sy agterstand ingehaal het en hy verkoop reeds goed.
GRANT SPOLANDER
Die Amarok se sterk punt is op teer, waar hy waarskynlik die beste van die vier vaar. Sy gebrek aan laestrekratte tel egter teen hom in die veld. Ek is al jare lank ’n aanhanger van die Isuzu. Ja, die enjin raas en is dalk nie die sterkste onder die lot nie, maar hy kan 200 kg meer vrag as die Hilux dra. Vir my is dit belangrik in ’n mark waar dit maklik is om onwetend jou bakkie te oorlaai.
Op die oog af het die Ranger en die Hilux die meeste sterk punte en die minste gebreke. Hulle bied die beste balans tussen veldryvermoë en rygerief op die pad. Wat die geheelindruk betref, sou ek sê dat die Ranger meer gerief as die Hilux bied.