Kom toer saam met ons!
Kom geniet ’n selfbestuurtoer saam met WegRy- Toere en Bhejane 4x4 Adventures na Etosha – Damaraland & Skedelkus
DAG 1. Die groep kom in Swakopmund bymekaar waar ons mekaar oor aandete rondom die vuur leer ken.
DAG 2. Ons verken Swakopmund met sy eiesoortige Duitse argitektuur en ’n groot verskeidenheid avontuuraktiwiteite – van vryval, sandbord en kwadfietsry tot dolfyne en walvisse kyk. (Die avontuuraktiwiteite is nie by die toerprys ingesluit nie.)
DAG 3. Ná ontbyt vertrek ons na die robkolonie by Seal Point. Op pad daarheen hou ons ’n piekniekmiddagete. Met ons aankoms by die Brandberg sal die span al die kamp opgeslaan hê en sal die kospotte reeds prut.
DAG 4. Ons doen ’n begeleide toer na die Brandberg en sy bekende Wit Vrou en ander Boesmantekeninge. Dan ry ons terug na die kamp vir ’n laat ontbyt en ’n rustige middag. Later sal jy die woestynsonsondergang van die voetheuwels van die Brandberg kan dophou met ’n skemerkelkie in die hand.
DAG 5. Hiervandaan ry ons wes na die bekende Skedelkus, waar ons die verlate myn by Toskanini besoek, ’n plek waar ’n fortuin gemaak – en verloor – is. Hierna mik ons oos na die oase by Palmwag.
DAG 6. Ons verken die Torrabewaringsgebied in Damaraland en volg die droë rivierbeddings van die Huaben Unjabrivier op soek na die woestynolifant en swartrenoster.
DAG 7. Vandag besoek ons die eienaardige landskap van die Verbrandeberg, die indrukwekkende vulkaniese rotsformasies die Orrelpype, en leer meer oor die eeue oue welwitschias in die streek.
Twyfelfontein, met sy prehistoriese skilderye en rotsgraverings, is ons volgende bestemming, en hierna mik ons na die Versteende Woud met sy 30 meter lange versteende bome.
DAG 8. Ons ry oor die Grootbergpas, dan Kamanjab en Outjo, waar ons brandstof kry, en saal af in ons eerste kamp in Etosha.
Laatmiddag sal ons gaan wild kyk en die aand die naglewe langs die verligte watergat by die kamp dophou.
DAG 9. Die oggend bring ons deur by die bekende skaduryke Ombikawatergat of op ’n wildrit in die park.
Vroegmiddag kan ons lekker om die kamp se swembad ontspan of die ander trekpleisters in die kamp besoek.
Vroegaand besoek ons die eiesoortige Sprokieswoud met sy sprokiesbome ( Moringaovalffolia).
DAG 10 & 11. Teen dié tyd ken ons almal al die park taamlik goed en het jy vir die volgende twee dae die geleentheid om dit op jou eie te verken. Die Bhejanegids is byderhand vir raad en die span sal ’n piekniekmandjie voorsien.
DAG 12. Ná ’n rojale ontbyt groet ons en ry huis toe.