DIE WARE JAKOB
Nie alle veelterreinbande is veelterreinbande nie. Ons verduidelik hoekom.
Vervaardigers beskryf dikwels hulle bande as veelterrein, of “AllTerrain” ( AT). Ongelukkig is hierdie begrip nie altyd duidelik nie, en selfs effens misleidend.
Vastrapvermoë, oftewel traksie, is belangrik vir enige veldryband, maar wanneer laas het jy ’n 4x4 gesien wat beheer verloor en begin tol het omdat die bande se loopvlakpatroon nie goed ontwerp is nie? Laat ek raai … nog nooit nie? Hoekom? Want die meeste bande bied ’n taamlike mate van vastrapvermoë op ’n verskeidenheid van oppervlakke, met die uitsondering van modder. Wat die vraag laat ontstaan: Wat maak ’n veldryband ’n ware veldryband? Ek glo die antwoord is eenvoudig: sy sterkte of duursaamheid.
Hoewel daar baie sogenaamde veelterreinbande op die mark is, is baie min van hulle regtig veldryprodukte wat betref hulle konstruksie, die hoeveelheid rubber wat die band bevat en die materiaal waaruit dit vervaardig is. Met ander woorde, hulle loopvlakpatroon lyk dalk soos dié van ’n veldryband, maar hulle konstruksie verskil nie veel van dié van ’n padband (HT-band) nie.
As jy nie oortuig is nie, doen ’n eenvoudige toets: Tel die band op en voel hoe swaar dit is. Ligter bande bevat min rubber, en swaarder bande bevat meer rubber. Die enigste rede waarom ’n band in die eerste plek swaar gemaak word, is ter wille van sy sterkte of duursaamheid. Dit is beslis nie om ekonomiese redes nie.
Waarom vervaardig maatskappye dan ’n veelterreinband wat nie aan die kernvereiste van duursaamheid voldoen nie? En weer ’n eenvoudige antwoord: Prys. Dis goedkoper om liggewigbande te maak. Goedkoper bande verkoop makliker, wat tot beter verkoopsyfers lei. Nog ’n groot pluspunt is dat liggewigbande minder raas, geriefliker op die pad is en brandstof bespaar.
As laasgenoemde drie eienskappe vir jou belangrik is wanneer jy ’n veelterreinband koop en jy nie dikwels in die veld gaan ry nie, geluk! Jy kan so op die kort termyn geld spaar. As jy egter wil weet hoe om ’n ware veldryproduk te onderskei, lees verder.
Die geheim lê in ’n band wat ’n LT genoem word. Die LT staan vir “Light Truck”. Die LT-band is ’n alternatief vir die sport nut s voertuig band, oftewel SNV-band. Ons kon nie die oorsprong van die term vasstel nie, maar die “LT” verwys in hierdie geval losweg na die band se vragdravermoë, en daarom sy sterkte. Met ander woorde: As ’n band nie “LT” op die sywand sê nie, is die kans goed dat dit ’n liggewigband is en nie ’n ware veldryband nie.
Jy sal ook op die band se sywand ’n letter sien wat sy vragdravermoë aandui. Hierdie alfabetletter (wat wêreldwyd erken word) stel die banddikte gelyk aan ’n vergelykbare laag-gradering. Byvoorbeeld: Die letter “E” op die sywand van die Cooper Discoverer S/T Maxx (265/65/R17) beteken dat die band ’n vergelykbare 10 laag-sywandgradering het. Ander graderingsimbole sluit in ’n C (6-laag) en D (8-laag). Die neiging om egter die hoeveelheid rubber aan ’n getal bandlae gelyk te stel, is verouderd en verwys nog na ’n ou soort buisontwerp.
Wat meer is, as jy die spesifikasies van bogenoemde Cooper-band met dié van ander veelterreinbande vergelyk (gebruik ’n 265/65/17-band as voorbeeld), sal jy vind die Maxx weeg 24,5 kg, teenoor die ander hoog aangeskrewe band wat net 18,2 kg weeg. Dit is amper 35% meer rubber!
As jy dus weer bande koop en duursaamheid vir jou belangrik is, moet jy dalk bande teen mekaar “opweeg”.