4X4-KUNGWINI
As mense hierheen kom vir opleiding, is die heel belangrikste vir my dat hulle as bevoegde 4x4-bestuurders hier wegry.” Johan Klopper is ’n toergids, 4x4-instrukteur en die ontwerper van Kungwini se roetes.
Hierdie plaas buite Bronkhorstspruit is waarskynlik een van die veelsydigste 4x4-bestemmings naby Pretoria. Hier is ’n 4x4-beginnersbaan, ’n breedvoerige oefenbaan, nóg ’n hindernisbaan vir meer ervare bestuurders én twee ekoroetes.
Johan Klopper, een van die eienaars, wat ook die hindernisse ontwerp het en ons op die plaas rond vergesel het, is ernstig oor 4x4-opleiding. Jy begin by ’n klein 4x4-baan waar hy ’n paar basiese tegniese begrippe en rytegnieke aan nuwelinge op ’n asknoper en steil bulte verduidelik. Daarna neem hy bestuurders na ’n pynlik netjiese opleidingsbaan met 12 hindernisse waar jy byna elke denkbare aspek van 4x4-ry kan oefen.
Dié “Basic Academy” se hindernisse is so netjies dit lyk amper soos ’n tuin, volledig met blombeddings en besproeiing. Moet egter nie dink dis ’n hindernisbaan vir sagte veldryers nie. Johan se hindernisse toets jou vernuf in alles – van naderings-, vertrek- en oorbruggingshoeke, tot banddruk, lyne lees, die regte rat kies, sywaartse hellings, modder, water, sand en ekovriendelike rytegnieke.
Wanneer hy tevrede is met ’n bestuurder se vaardigheidsvlak, “matrikuleer” hulle na die Advanced Eco Academy, waar 17 gemerkte hindernisse in die veld uitgelê is, met ’n paar ekstras tussen-in.
Nes die beginnersbaan, is dit ontwerp sodat bestuurders uiteenlopende en uitdagende 4x4-hindernisse kan baasraak, maar in ’n beheerde omgewing. Johan is deurgaans byderhand om jou touwys te maak of selfs langs jou te sit terwyl jy ry.
As jy nie kom vir die opleiding of hindernisuitdagings nie, kan jy ook in die skaduryke kampterrein afsaal en op eie stoom die ekoroetes gaan ry. Dié roetes is mooi, rustige veldpaadjies tussen die kleurvolle koppies van die oostelike Magaliesberge deur. Langs die pad sal jy interessante rotsformasies sien, asook die ruïnes van ou klipkrale wat eeue gelede deur inheemse mense hier gebou is. Jy eindig met ’n mooi uitsig oor die Bronkhorstspruitdam voor jy weer teen die koppies afkruie kamp toe, waar ’n goed versorgde ablusieblok en ’n lapa met ’n groot braaiplek, asook ’n boma vir funksies, op jou wag.