Nóg meer waarde vir jou Ford
Die Ford Ranger- sowel as die Everest-reeks het onlangs verdere verbeteringe aan hulle spesifikasievlakke gehad.
Ford se jongste generasie SYNC®3-info-vermaakstelsel is nou vir die eerste keer te kry in die Ranger XLT-en Wildtrak-bakkiemodelle, asook in die Everest XLT en Limited. Veldryvermoëns is ook verbeter, met ’n agterste ewenaarslot nou standaardtoerusting op alle Everest 4x2-modelle, asook Ranger XL-, XLS-, XLT- en Wildtrak-modelle.
Die Ranger XLS-modelle het nou ook ’n trukamera en parkeersensors as standaardtoerusting, terwyl alle nuwe modelle ook ’n spaarwielslot het.
Ford se SYNC®3-infovermaakstelsel met satellietnavigasie, het ’n 8 duim-kleurraakskerm met verskeie aksies (skuif, afrol, vee en knyp-om-te-zoem), asook stemherkenning waarmee dit verskeie opdragte sal uitvoer.
Alle SYNC®3 met navigasiestelsels wat in Suid-Afrika verkoop word, het meer as 20 lande se kaarte gelaai, waaronder dié van Angola, Benin, Botswana, Burkina Faso, Burundi, Ghana, die Ivoorkus, Kenia, Lesotho, Malawi, Mauritanië, Mauritius, Mosambiek, Namibië, Nigerie, Rwanda, Senegal, Suid-Afrika, Swaziland, Tanzanië, Togo, Uganda, Zambië en Zimbabwe.
Meer as 3,6 miljoen kilometer se paaie en 869 000 se Punte van Belang (POI) is gelys.
Nóg ’n puik innovasie is die insluiting van Tracks4Africa, wat Ford Ranger- en Everest-eienaars in staat stel om voordeel te trek uit die data van die T4A-gemeenskap. Alle modelle met SYNC®3 met navigasie in Suid-Afrika sal vir die volgende vyf jaar kwalifiseer vir gratis opdaterings aan die kaartsagteware.