BUFFELSFONTEIN

As jy al ooit Weskus Nasionale Park toe gery het of die N7 noord teen die Weskus op is, het jy beslis al by Buffelsfontein verbygery. Maar min mense weet hier skuil ’n lekker 4x4-roete, want Buffelsfontein word meestal as ’n natuurreservaat, konferensiesentrum en troubestemming bemark.

’n Entjie die duine in, agter al dié netjiese geriewe, lê daar egter ’n sandroete wat vir vet pret skaars ’n uur buite die stad vir jou en ’n paar pêlle sal sorg. Dis “net” ’n graad 2- tot 3-roete, maar teen die einde van die Wes-Kaap se kurkdroë somer is Buffelsfontein se sand so los soos ’n sak Tastic-rys. G’n banddruk hoër as 0,8 bar sal ’n kans staan nie.

Jy moet deurgaans goeie momentum handhaaf (al is jy op maklike dele van die pad) en net teen afdraandes stilhou. Hier het glo al fris Jeeps met groot bande hulself só ingegrawe dat die plaastrekker moes kom help.

Die pad is ’n sirkelroete van sowat 14 km deur die Weskus-fynbos, oor duine en deur digte gras en bome, en bied mooi uitsigte oor die reservaat se ongerepte natuurskoon. Hou ook jou oë oop vir Buffelsfontein se wild – onder meer koedoes, buffels, kameelperde, blouwildebeeste, sebras en elande. Hier loop ook ’n paar renosters rond, maar dié sal jy waarskynlik eerder laer af op die plaas, êrens op die oop vlaktes, as in die ruigtes rondom die sandroete sien.

Sowat halfpad is ’n speelplek waar jy behoorlik sand kan rondgooi en bulte storm en daarnaas ’n lekker boskamp. Hier staan permanente bostente en daar is spoeltoilette en warm water, maar geen elektrisiteit nie, soos dit ’n boskamp betaam. Jy sal kwalik glo jy’s net meer as ’n uur van die stad af weg as jou vuur saans hier diep tussen die duine knetter.

Voor jy die roete begin, kry jy ’n kaart van die reservaat waarop dit aangedui is. Daar is egter nie aanwysingsborde op die paadjie nie en dis maklik om in die sand te verdwaal. Vra dus vir meer aanwysings as jy aanmeld of hoor of iemand die eerste ronde saam kan ry. Die roete duur net ’n uur en ’n half of wat en jy kan dit maklik ’n paar keer in ’n naweek ry.

SANDKASKENADES. Buffelsfontein-natuurreservaat se 4x4-roete is in dik sand tussen die duine. Hier kan jy lékker speel en jou enjin se toere ’n bietjie jaag.

BEL ’N PÊL. Teen die einde van die somer, en veral in die hitte van die vroeë middag, is die sand poeierlos. Sorg maar dat jy en jou pêlle die herwinningstoerusting ingooi.

PURE NATUUR. Buffelsfontein is net sowat ’n uur van Kaapstad, maar jy voel ver weg van die wêreld. Hier is allerhande diere (selfs renosters) en ’n mooi boskamp in die duine.