LEEUWENBOSCHFONTEIN
Hierdie gasteplaas tussen De Doorns en Montagu is ’n gewilde uitspanplek en 4x4-roete sowat twee uur se ry vanaf Kaapstad. Wanneer jy ongeveer 22 km ná De Doorns suid op die R318, in die rigting van die plaas draai, is dit pure Klein-Karoo om jou. Sowat 27 km later draai jy links op ’n lang, reguit grondpad tot by die ingang, waar bruin renosterbos buite die truspieëls lê.
Leeuwenboschfontein lyk soos ’n klein oase as jy by die hek inry. ’n Grasgroen lusernland strek voor jou uit, die beddings en grasperke tussen die chalets en staanplekke staan ewe groen en die plaasdamme lê vol boorgatwater.
Die plaas se 4x4-roetes begin net agter die kampterrein. Daar is twee van hulle – 1, wat teen ’n groot heuwel tot by ’n uitkykpunt kronkel, en 2, wat in ’n groot sirkel oor ’n paar kleiner koppe onder die uitkykpunt loop.
Leeuwenboschfontein bied iets vir almal, maar die eienaar, Johan Roux, mik sy roetes hoofsaaklik op standaardvoertuie en bestuurders wat nie baie 4x4-ervaring het nie.
Die plaas se vorige eienaar, Jannie du Plessis, het die roetes ontwikkel. Jannie is ’n bekende in 4x4-kringe en het die roetes noukeurig uitgelê. Hy het toevallig ook aan al die departement van omgewingsake se vereistes voldoen, wat beteken die regering het die roetes die regmerkie vir omgewingsvriendelike veldpaaie gegee.
Ons het Loop 1 met ’n standaardChevrolet Trailblazer met padbande afgelê en geen probleme gehad of skade opgedoen nie. Die meeste van dié sirkelroete is ’n goeie tweespoorpad en waar die klipbulte rof raak, het Johan die ergste gate met ’n bietjie sement opgevul of draad oor die los klippe gespan.
Let wel, jy het steeds ’n laestrekratkas nodig om hier te kom ry en jy moet dus nie dink dis só maklik nie. Loop 2 is ook heelwat meer hardebaard as eersgenoemde en ons Chev – met sy padbande en lae treeplanke – was nie hiervoor geskik nie. Dié roete het ’n paar lekker uitdagings vir veldryers. Dis ook nie ’n karbreker nie, maar daar is heelwat meer
Ek wil hê mense moet met gewone 4x4-voertuie hier by ons kan kom ry en die natuurskoon van die omgewing geniet.” Johan Roux is die eienaar van Leeuwenboschfontein-gasteplaas.
kliphindernisse waar jy mooi moet konsentreer op jou lyne en spoed, sê Johan. Name soos “Lion’s Balls” behoort jou ’n idee te gee van hoe Loop 2 se hindernisse daarna uitsien . . .
Johan het ook so pas ’n soort speelgat met ’n stootskraper onder naby die kampterrein laat maak waar jy vet bulte en afdraande kan aanpak. Ook hier het ons standaardvoertuig egter die mas opgekom.
Leeuwenboschfontein is al voorheen as een van WegRy se toproetes aangewys en André de Villiers van Safari 4x4 het dit as een van sy top 5-Platinumbestemmings gekies. Jy kan dus maar weet dat jy lekker gaan ry (en bly) as jy hier kom kuier.
Moenie by Marcuskraal-4x4 opdaag met padbande of lae treeplanke nie. Jy sal gou iets beskadig, want dié klipperige bergroete is nie ’n mak een nie. Ons het dit wel met gemak in ’n standaard-Ford Ranger met veelterreinbande voltooi, maar goeie grondvryhoogte en laestrek is ’n moet en ’n agterste ewenaarslot gaan jou baie sukkel spaar.
Die roete, net anderkant Citrusdal, is omtrent 24 km lank en sal vir vier uur vol goeie tegniese uitdagings sorg, waar jy jou ryvernuf mooi tussen die klippe sal moet ken. Die roete wikkel homself in ’n sirkel om die plaas en jy ry deur prentjiemooi berge vol fynbos met wye uitsigte oor die Sederberge. Langs die pad sal jy ’n stuk of agt hindernisse teëkom wat enigiets van los sand of klippe tot liederlike klipbulte kan wees.
Tussen die hindernisse kan jy by drie uitkykpunte stilhou en daar is ’n piekniekplek onder hoë bloekombome waar jy langs ’n stroom kan uitspan en middagete of ’n koeldrank geniet.
Die roete is ook só uitgelê dat jy nie die hele vier uur hoef te ry as jy nie wil nie, want daar is ’n ontsnaproete omtrent halfpad en ’n kortpad of twee om die roete tot 2 of 3 uur in te kort. Gesels met die eienaar Christi Mouton, hy sal ’n roete voorstel wat jou net so lank sal besig hou as wat jy wil.
Marcuskraal se ergste uitdagings, soos die steil klipbult genaamd Klippekou, het ook ontsnaproetes. Die roete is dus geskik vir minder ervare bestuurders, maar met sy goeie uitdagings moet jy gereed wees om in elk geval ’n bietjie klippe te kou as jy hier kom ry, al ry jy die ergste hindernisse mis.
Die paadjie gaan op teen die Osberg-reeks, asook tot bo-op die Dwarsrugberg. Van die kruine kyk jy af op lowergroen lemoenboorde en kan jy op ’n mooi dag tot by die Atlantiese Oseaan sien.
En gepraat van lowergroen, Marcuskraal se kampeerplek is op sagte gras onder groot koeltebome uitgelê. Die nuutgeboude ablusiegeriewe is pragtig en hier is ’n groot swembad, onthaalgeriewe en ’n groot klimraam en speelterrein vir kinders. Jy kan selfs reël dat iemand jou skottelgoed vir jou was!
Marcuskraal het ook ’n paar nuwe en moderne selfsorgkamers met DStv, lugversorging en ’n braaiplek op ’n klein stoepie. En as jy en ’n paar vriende lus is vir ’n ordentlike bederf, bespreek een van die twee luukse selfsorg-chalets. Hierdie drieslaapkamer-chalets het elk ’n volledige kombuis (met ’n skottelgoedwasser, nogal), lugversorging in elke kamer én ’n borrelbad op die stoep!