WELGELEGEN-4X4
Welgelegen-4x4 lê ’n skrale 10 km van die noordelike voorstad Brackenfell af, op die Bottelarypad in die rigting van Stellenbosch. Maak egter seker jy gooi ’n draai by Die Vleiswinkel (Kruisstraat 31, Brackenfell) vir ’n ordentlike sak biltong terwyl jy op pad is, want hier is hindernisse wat jou energie behoorlik gaan tap.
Welgelegen se roete is sowat 9 km lank, met hindernisse wat op en af in die Bottelary-heuwels loop. Jy trek weg teen ’n stywe bult met ’n lekker asknoper as jy nie jou lyn mooi kies nie, maar dié hindernis is ’n vulletjie teenoor dié wat hoër op wag. Jou tweede uitdaging is ’n reeks kliptrappe wat mooi mikwerk verg. Dié hindernis is ook nie geskik vir voertuie met treeplanke of ’n lae grondvryhoogte nie. Oral oor die klippe is skrape waar ’n paar ouens se onderstelle (of hopelik net hulle onderstelbeskerming) met die aarde kennis gemaak het. Van daar af ry jy deur ’n reeks soortgelyke hindernisse en slote waar jy kan oefen om teen hellings te ry en jou voertuig se afmetings en draaisirkel gewoond te raak.
Na dié uitdagings ry jy op ’n mooi grondpad teen een van die hoogste Bottelary-koppies uit, met pragtige uitsigte oor Stellenbosch se Simonsberg en die kleurryke wingerde van die omgewing.
Terwyl hierdie ’n maklike stukkie rywerk is, is sommige van Welgelegen se hindernisse, soos Brokeback Mountain, ernstige bangmakers. Hierdie hindernisse is net bedoel vir gemodifiseerde voertuie met bande wat hoër as 30 duim staan. Daar is dus lekker speelplek vir almal, of jy nou ’n Jeep Rubicon wat soos ’n mini-monstertrok ry, of ’n doodgewone Fortuner met ’n stel veelterreinbande ry.
Welgelegen is ’n werkende familieplaas en waar jy ook al ry, word jy beloon met mooi uitsigte oor die wingerde, proteas en fynbos. Die plaas is sewe dae van die week aan die gang en jy kan die roete dus enige dag kom ry, solank jy net vooraf bespreek en ’n minimum van twee ander voertuie saambring.