“En die beste veelterreinband is . . .”
In 2014 het ons Suid-Afrika se mees omvattende veelterreinbande-toets gedoen. Ons het pas hierdie toets herhaal – met ’n interessante nuwe toets om die kaf van die koring te skei. JACO KIRSTEN het agter die stuur van die toetsvoertuie ingeskuif.
DIE BANDE:
Ons het hierdie keer besluit om minder bande te toets. Een van die oorwegings hiervoor – afgesien van die feit dat dit vrek baie geld en moeite verg – is dat ons nou al weet dat die goedkoper bande in die algemeen nie kan kers vashou by die bande van die groot vervaardigers nie. Die bande wat altyd goed vaar, is dus een van ’n paar moontlike vervaardigers en dit maak daarom nie sin om dae lank te toets aan bande wat mense bloot vir die prys koop nie. Ons het uiteindelik die volgende lys opgestel: 1. General Grabber AT3: Die AT3 is die plaasvervanger vir die AT2, die band wat ons eerste veelterreintoets gewen het. Dit was daarom logies om te sien of hy sy kroon sou behou. 2. Goodyear Adventure All Terrain: Die Adventure is Goodyear se nuwe plaasvervanger vir sy bekende AT/SA-band. Die AT/SA het vierde gekom in ons vorige toets. Hoe goed sou die plaasvervanger wees? 3. Die BF Goodrich All-Terrain T/A K02: Die BFG is ’n legendariese band en baie gewild onder veldryers. Die K02 is twee jaar gelede bekend gestel en ons wou weet hoeveel van ’n verbetering hy op sy voorganger sou wees. 4. Die Continental CrossContact AT: Hierdie is ’n goeie band wat oorspronklike toerusting op die Ford Ranger was. 5. Hankook Dynapro ATM RF10: Die Hankook was onder die topdrie tydens ons eerste toets en ons wou weet hoe hy teen die nuwer bande sou vaar. 6. Yokohama Geolandar A/T-S: Hierdie is ’n groot verkoper in SA en is billik geprys. 7. Die Adventuro GT Radial AT: TI Auto Brands, die invoerders en verspreiders van Hankook en Yokohama in Suid-Afrika, het gevra of ons hom nie ook wou toets nie om te sien hoe hy teen die gevestigde bande sou vaar.
Nota: Ons het Cooper-bande gekontak om die Discoverer ST Max deel van die toets te maak. Hulle wou egter nie deelneem nie. Dieselfde het gegeld vir Mickey Thompson. Bridgestone, wie se Dueler ook goed gevaar het in die vorige toets, en aanvanklik ingestem het om deel van die toets te wees, maar het toe “logistieke probleme” aangevoer as rede vir hulle nie-deelname. Soos gewoonlik, wou BF Goodrich, wat deur Michelin besit word, ook nie deel van die toets wees nie, en het ons self ’n stel via ’n handelaar aangeskaf omdat hierdie band te belangrik is om nie by so ’n toets in te sluit nie. Vir praktiese redes het ons bande in 265/65 17-grootte gebruik.
DIE TOETSE
Teerpad-remming: ’n Band se remvermoë is direk eweredig aan sy fisieke greep. Met ander woorde, as ’n band hoë greepvlakke het, sal hy goeie remafstande behaal. Hoewel veelterreinbande vir grondpaaie en veldwerk gebruik word, ry die meeste mense steeds meer as 50% van hulle afstande op teer. Drie noodstoppe is gedoen teen 100 km/h, en die gemiddelde van die drie afstande is bereken.
Grondpad-remming: Hiermee kon ons bepaal hoeveel greep ’n band op ’n grondpad het. Ons het drie noodstoppe teen 70 km/h gedoen, waarvan ’n gemiddelde bereken is.
Klimtoets: Hier het ons teen ’n helling van tussen 30 grade en 40 grade in eerste rat, laestrek, uitgeluier. Ons sou begin met alle bande teen 1,5 bar en dit dan geleidelik tot 2,2 bar verhoog. Indien ’n band dit teen 2,2 bar kon uitluier sonder om traksie te verloor, het die band volpunte behaal.
Sywand-penetrasietoets: Hiermee het ons gekyk hoeveel weerstand ’n band bied teen ’n skerp voorwerp wat in die skouergedeelte van die sywand gesteek word. Ons het elke band drie keer stukkend gesteek terwyl dit teen ’n druk van 2,0 bar opgepomp was.
DIE VOERTUIE
Om tyd te bespaar, het ons twee identiese Toyota Hilux 2.4 GD-6 SRX 4x4-bakkies gebruik. Terwyl ons ’n stel bande met die een voertuig getoets het, is die volgende stel bande al op die ander bakkie aangebring. Ons kon geen verskil in remafstande met ’n stel kontrolebande tussen die twee voertuie bespeur nie.
DIE TERREIN
Nes met die eerste veelterreinband-uitkloptoets in 2014, het ons weer van Klipbokkop se geriewe gebruik gemaak. Hulle is ingerig vir hierdie soort toetse en daar is toegang tot ’n teerpad (in hierdie geval ’n betonpad met soortgelyke greepvlakke as teer), grondpad, sand, klip en konstante hellings waar herhaalbare toetse gedoen kan word.
DIE TOETSBESTUURDER
Jaco Kirsten, WegRy se redakteur. Afgesien van gevorderde 4x4-opleiding, het hy verskeie hoëspoed- en gevorderde kursusse gedoen, insluitend van Porsche, MercedesBenz AMG, Audi en die Suid-Afrikaanse Motorskrywersgilde. Hy het ook spesialisysry-opleiding in Swede ondergaan.
Ons het twee identiese Toyota Hilux 2.4 GD-6 SRX 4x4-bakkies gebruik. Ons kon geen verskil in remafstande met ’n stel kontrolebande tussen die twee voertuie bespeur nie.”
1 TEERPADREMMING Hier was die Goodyear Adventure die onbetwiste koning, met ’n gemiddelde remafstand van 35,8 meter. Die bande was egter redelik naby aan mekaar, met die tweede band, die Hankook Dynapro ATM, wat slegs 30 cm langer gevat het om tot stilstand te kom. Soos verwag, het die BFG T/A die langste remafstand met 39,6 meter gehad. Hy het nie net die meeste padgeraas gehad nie, maar het ook die losste op teer gevoel.
Hoewel veelterreinbande vir grondpaaie en veldwerk gebruik word, ry die meeste mense steeds meer as 50% van hulle afstande op teer.”
2 GRONDPADREMMING Hier was die Goodyear Adventure en die Yokohama Geolandar die gesamentlike wenners, met die BF Goodrich en Hankook Dynapros ’n kortkop agter hulle. Die Adventuro GT Radial AT’s was heel laaste, met ’n remafstand van meer as 3 meter verder as dié van die wenners.
3 TRAKSIE Ons het besluit om die bande tot 1,5 bar af te blaas en die hindernis – ’n lang, steil opdraand, wat teen 30 grade begin en teen ongeveer 40 grade eindig – in eerste rat, laestrek, uit te luier. Daar is teen ’n druk van 1,5 bar begin, waarna die banddruk geleidelik verhoog is. Indien ’n band die helling teen 2,2 bar kon uitluier sonder dat traksie verloor word, is dit beskou as ’n 100%-slaagsyfer. Tot ons verbasing kon al die bande dit regkry. Wat net bevestig dat die meeste bande genoeg greep het vir die meeste aanwendings.
Ons het ’n lang, steil opdraand – wat teen 30 grade begin en teen ongeveer 40 grade eindig – in eerste rat, laestrek, uitgeluier.”
4 SYWAND-PENETRASIE Hierdie toets is een van die belangrikste toetse in ons uitkloptoetse. Ons is trots daarop dat geen ander plaaslike publikasie al ooit ’n soortgelyke toets probeer doen het nie. Ons het ’n paar jaar gelede ten duurste ’n masjien laat bou wat die druk (in kPa) kan meet van wat dit verg om iets te penetreer. Volgens ons is ’n band se vermoë om skerp voorwerpe te weerstaan een van die heel belangrikste eienskappe – baie belangriker as teerpadhantering en bandlewe – as jy régtig die bos wil invaar. Soos verwag het die BF Goodrich T/A homself hier regtig onderskei. Insgelyks het ons ook verwag dat die Continental CrossContact AT nie goed sou vaar nie. Uit persoonlike ervaring is hulle greep goed, maar is hulle sywande kwesbaar vir skerp voorwerpe. Dit bly ’n goeie band vir die teerpad, maar ’n mens vermoed dis ontwerp as ’n 90:10 teerpad/grondpad-band.