EK WIL OOK GAAN!
GPS: S33.264264 E18.224331 Naaste dorp: Yzerfontein
Hoe lyk die roetes? Buffelsfontein se sandroete lê in ’n sirkel oor dié natuurreservaat. Behalwe vir ’n bult of twee in ’n sandspeelput is daar nie spesifieke hindernisse nie. In die droë maande is die sand egter so los dat byna die hele roete ’n hindernis word.
Het ek ’n 4x4 nodig? Wanneer die sand baie droog en los is, sal jy ’n 4x4 met laestrek nodig hê om nie vas te val nie. ’n Agterste ewenaarslot sal dan ook baie help. Die sand hou geen risiko vir bande in nie, maar as jy met padbande kom ry, moet jy mooi kyk vir die droë takke wat plek-plek gevaarlik uit die sand steek. In die wintermaande ná die reën sal die roete aansienlik makliker wees.
Waar kan ek bly? Hier is ’n boskamp in die duine met permanente tente en goeie geriewe (geen elektrisiteit nie), asook ’n klomp ander netjiese verblyfplekke, van luukse kothuise tot selfsorgeenhede en ’n groot selfsorg-gastehuis.
Wat kan ons nóg doen? Buffelsfontein sal jou en jou gesin vir lank kan besig hou. Hier is leeus, jagluiperds en ’n seldsame swartluiperd wat jy kan besoek. Die katte loop nie wild rond nie, maar jy kan saam met ’n gids by die jagluiperds se hok ingaan. Verder is hier wildritte, ’n groot restaurant en kroeg, watergate waar jy kan wildkyk, ’n swembad, skyfskiet en kleiduifskiet.
Koste: R250 vir die eerste voertuig en R50 per persoon daarna (minimum van drie voertuie op die roete). Die verblyfpryse wissel van R135 p.p. in die boskamp as jy jou eie tent en beddegoed bring, tot R660 p.p. vir die selfsorgeenhede (buite seisoen) en R5 350 vir die gastehuis (20 mense). Besoek www. buffelsfontein.co.za vir ’n volledige pryslys.