Toyota bly tops
Syfers vir Mei het getoon Toyota Suid-Afrika het weer die meeste voertuie in Suid-Afrika verkoop. Toyota het in dié maand nie minder nie as 9 601 voertuie van die hand gesit – 3 215 meer as sy naaste mededinger – en só amper ’n kwart (23%) van die mark sy eie gemaak.
Sportnutsvoertuie bly van die vervaardiger se gewildste voertuie, met 2 150 wat verkoop is. Die nuwe Fortuner is in Mei in 1 249 motorhuise geparkeer, terwyl 420 RAV4’s baas gekry het. Dié syfers het gesorg dat die Fortuner en RAV4 onderskeidelik die topverkopers in die segmente vir groot en middelslag-sportnutsvoertuie was. Die resultate wys ook die voortgesette gewildheid van die Hilux: Dié bakkie het 32,2% van sy marksegment verower, danksy 2 758 eenhede wat handelaars se vloer verlaat het.
Internasionaal het Toyota in die jaarlikse BrandZ-peiling van die top 100 handelsname ter wêreld sy titel behou as die wêreld se gewildste motornaam. Dis die negende keer dat Toyota dié titel verower in die twaalf jaar dat die peiling gedoen word.
Die vervaardiger blyk egter nie net gewild te wees vir sy petrol- en dieselvoertuie nie; verbruikers het die maatskappy ook punte gegee vir nuwe tegnologie soos die Mirai, ’n voertuig wat met waterstofbrandstofselle werk, en die Concept-i-selfrymotor.
Net soos die plaaslike data wys dié peiling ook ’n skynbaar onstuitbare verskuiwing na sportnutsvoertuie.