NUWE RYGOED
Die Hyundai Tucson, wat reeds ’n goeie verkoper is, het ’n nuwe Sport-pakket bygekry, en dít, sê Charles Thompson, maak dié nutsvoertuig pure pret.
Die woorde “body kit” laat by ’n mens beelde oproep van ou BMW’s en Subaru’s met Tupperware vir drukvlerke en plastiekbuffers wat soos ploegskare lyk. Maar as ’n vervaardiger self ’n sportpakket vir een van sy modelle bekend stel, kan dit ’n stylvolle affêre wees. En dít is inderdaad die geval met die nuwe Hyundai Tucson Sport.
Buitelangs
Die Tucson Sport is ’n gedeelde projek tussen Hyundai Suid-Afrika en Suid-Korea. Die buffers word uit Asië ingevoer, terwyl die nuwe wiele in samewerking met Tiger Wheel & Tyre ontwerp is. Met sy laer buffers, pikswart 19 duim-sierwiele en vier uitlaatpype lyk die Sport heelwat aggressiewer as die stylvolle standaardmodel. Die buffers is oorwegend dieselfde kleur as die res van die voertuig, met chroom en swart insetsels voor, agter en onder die deure.
Terwyl die gewone Tucson se stilering meer gemik is op mense wat op soek is na ’n netjiese gesinsvoertuig, is die Sport ’n opgeboude bielie wat lyk of hy langs jou in die verkeer wil stilhou en jou daag vir ’n dice.
Binnelangs
Die Sport-pakket is te kry in die 1.6 GDI Executive-model, wat in die middel van die reeks lê. Soos met al Hyundai se voertuie is die Executive propvol standaardweeldes soos leersitplekke, outomatiese lugreëling, ’n trukamera en spoedbeheer. Jy betaal ook nie ekstra vir ’n raakskermradio met satelliet- navigasie, ’n USB-sok en Bluetooth nie.
Die Sport-model kom nie met enige binnelangse veranderinge soos sportsitplekke, -embleme of -pedale nie, maar die binneruim is van dieselfde hoë gehalte en netjiese ontwerp as wat ’n mens teen dié tyd van Hyundai-produkte verwag.
Agter die stuur
Die turbo-aangedrewe 1.6 GDI-enjin bly ook standaard en ontwikkel dieselfde 150 kW en 295 Nm wringkrag as die Executive-model. Die Tucson Sport se uitlaatstelsel is egter aangepas om plek te maak vir vier fris uitlaatpype. (Daar is darem nog plek vir ’n sleepstang.) Die uitlaatpype grom soos ’n kwaai hond wanneer jy die voertuig aanskakel en blaf lekker as jy die versneller wegtrap. Jy
ry nie régtig vinniger in die Sport nie, maar elke ratverwisseling en verbysteek is heelwat prettiger as in die standaardmodel.
Die 19 duim-bande maak die rit wel effens harder as in ’n soortgelyke model met 18 duim-bande, maar dis steeds gemaklik en daar is nie merkbaar meer padgeraas in die kajuit nie.
Ons hou veral van die konstante diepkeelgrom wat die uitlaatstelsel maak wanneer jy op spoed is. Dis nie só oordonderend dat dit jou oor lang afstande sal irriteer nie – eerder net genoeg om die prettige rit in dié Hyundai te onderstreep.
Slotsom
Teen ’n halfmiljoen rand is die Tucson Sport duurder as mededingers soos die Volks- wagen Tiguan en Mazda CX-5. Dis egter te verwagte vir ’n sportmodel wat – hoewel dit nie ’n volwaardige beperkte uitgawe is nie – steeds ’n taamlike unieke weergawe van dié nutsvoertuig is. Die Tucson Sport is boonop nie gebou om ’n direkte mededinging vir ander vervaardigers se standaardmodelle te wees nie. Dié is ’n unieke produk.
Die stilering is dalk nie subtiel genoeg om in hordes mense se smaak te val nie, maar met sy voor-op-die-wa houding en grootbek-uitlaatstelsel is hy pure pret om te bestuur. En jy kry boonop steeds Hyundai se puik spesifikasievlakke en klasleidende sewejaarwaarborg.
Prys
Hyundai Tucson Sport R499 900