NEELS SE STOEPTENT
Provinsiale politici en dorpsleiers moet by suksesvolle oordbestuurders om raad aanklop om hulle provinsies en dorpe gewilde toerismebestemming te maak, sê Neels van Heerden.
In hierdie mooi land van ons is genoeg kundigheid om toerisme te bevorder...
Om die kampvuur wil ’n mens nie eintlik politiek praat nie. Ek kan egter nie anders nie as om gal te braak oor die ouditeur-generaal (OG) se jongste verslag oor munisipaliteite se geldsake. Dis ’n lelike prentjie: Teen Junie verlede jaar het munisipaliteite meer as R41,7 miljard se opgeloopte onreëlmatige besteding aangegaan – die meeste nóg.
Slegs 49 van die 263 plaaslike owerhede het ’n skoon oudit gekry. In die Wes-Kaap het meer as 80% van die munisipaliteite die toets geslaag. Die naasbeste provinsie is KwaZulu-Natal, met ’n slaagsyfer van 18%. In Gauteng staan Ekhuruleni kop en skouers bo die res uit.
Die ontstellende nuus is dat twee derdes van die land se munisipaliteite streng gesproke bankrot is. BINNE DIÉ SLEGTE PRENTJIE lyk die toerismeprentjie ewe beroerd. ’n Dagblad het vroeër berig oor die 700 provinsiale en munisipale vakansieoorde en toerismebestemmings wat nie meer besoek kan word nie omdat hulle te vervalle geraak het. Én dis nie fopnuus wat ’n verslaggewer uit sy of haar duim gesuig het nie: Dis syfers wat deur die vorige minister van toerisme in die parlement ter tafel gelê is in antwoord op ’n geskrewe vraag van ’n lid van die opposisie.
Toerismebestemmings is van ons land se bates vir werkskepping en ’n belangrike inkomstebron vir provinsies en veral kleiner munisipaliteite.
Van die politici en dorpsleiers verstaan egter nie dat ’n groot deel van ’n oord se inkomste weer teruggeploeg moet word in die oord om die standaard te handhaaf nie.
As toeriste nie meer jou dorp besoek nie, bly werksgeleenthede in die slag, winkels en ander ondernemings kwyn en jou belastingbasis word kleiner.
IN HIERDIE MOOI LAND van ons is genoeg kundigheid om toerisme te bevorder. Vat nou maar die ATKV, ’n maatskappy met die insig en kundigheid om oorde behoorlik en doeltreffend te bestuur, as voorbeeld.
Ongeveer tien jaar gelede het hulle die eens vervalle Eiland-oord naby Tzaneen gekoop en dit ontwikkel tot een van Limpopo se heel beste vakansiebestemmings.
Aan die ander kant het die provinsie se toerismeraad in duie gestort omdat hy met amptenare sit wat g’n benul het hoe om ’n provinsiale oord of toerisme in die algemeen te bestuur nie.
Net duskant die ATKV EilandSpa bedryf die provinsiale regering ’n wildreservaat wat graag besoek word deur die “swaeltjies” wat jaarliks met hulle woonwaens en tente by die ATKV-oord oorwinter.
Die regering onderhou egter nie die staproetes in die reservaat nie, en die gras staan al kophoogte. By navraag moet die ATKV hoor die reservaat se trekkerbestuurder wag al maande lank vir enjinolie. Die ATKV gaan koop sommer dieselfde dag nog ’n blik olie by die koöperasie op Letsitele, en siedaar: Al die veld is weer vrolik en die “swaeltjies” tjilp weer tevrede.
NET SOOS die KwaZulu-Natalse Suidkus het die noordelike dele van Limpopo die potensiaal om ’n gesogte bestemming te word. Plaaslike gemeenskappe moet bemagtig en in staat gestel word om klein kampplekke te ontwikkel, bestuur en onderhou. Plaaslike inwoners kan kampkos maak, veiligheidsdienste lewer en toergidse word wat kampeerders die unieke natuurskatte en diere- en plantlewe gaan wys.
Ek glo vas suksesvolle maatskappye soos die ATKV en Forever sal met graagte help met opleiding, raad en daad. Die politici en leiers moet net vra!