Só volledig, hy’s amper vervelig
Baie van die XC90 is te sien in die nuwe, kleiner Volvo XC60, maar leen is lankal nie meer ’n vloekwoord nie.
Kom ons wees nou maar eerlik: Min mense weet regtig wat in Swede aangaan, wat nog te praat van saam gesels oor dié land se ekonomie of belangrikste uitvoere. Maar dis alles oraait, solank jy darem ABBA (of Roxette, as jy jonger is), Absolutvodka en volwasse “oefenvideo’s” kan opnoem.
Voor 2015 het die meeste Volvo’s jou ’n dop laat skink om van hulle te probeer vergeet, maar sedert die bekendstelling van die sewesitplek-XC90 is Volvo skielik ’n vervaardiger om dop te hou.
Die XC90 is verlede jaar (met reg) aangewys as Suid-Afrika se Motor van die Jaar, en nou is sy nuwe kleinboet, die tweedegeslag-vyfsitplek-XC60, ook propvol van dié kampioentegnologie.
Op die oog af
Die eerste ding wat jy moet weet, is dat hy heelwat van die XC90 se DNS gekry het. Albei voertuie is op Volvo se nuwe veeldoelige SPA-platform ( Scaleable Product
Architecture) gebou en kry dieselfde enjins en veiligheidstegnologie (later meer daaroor).
Die nuwe XC60 is 61 mm langer as sy voorganger en die asafstand is 99 mm langer. Hier trek die agterste passasiers die grootste voordeel met 40 mm ekstra beenspasie.
Die opvallendste verskil tussen die XC60 en sy grootboet is eers werklik merkbaar wanneer jy sy meer kompakte, effens minder statige, agterkant sien. Kortom: Die XC90 laat dit lyk asof jou geld vir jou werk en die XC60 asof jy werk vir jou geld.
Onder die enjinkap
Volvo se doelwit is langtermynkostedoeltreffendheid. Hoe meer modelle dieselfde komponente kan deel, hoe beter. Gevolglik word dieselfde tweeliterenjin in die XC90 en XC60 ingespan.
Om produksie te vergemaklik word die basiese enjin so modulêr as moontlik gebou. Slegs die nodigste komponente met verskillende vereistes, soos petrol- of dieselontbranding, hoef dan agterna bygevoeg te word.
Alle petrolmodelle is ’n turboof drukaangejaagde variant (óf ’n kombinasie van die twee, met of sonder elektriese aandrywing) van dieselfde eenheid om wisselende vlakke van krag te lewer.
Onder die modelle wat bestem is vir Suid-Afrika, gee die T5-intreepetrolmodel 187 kW en 350 Nm en die warmer T6 235 kW en 400 Nm. Verder is daar ook twee dieselenjins waarvan die D4 140 kW en 400 Nm en die D5 173 kW en 480 Nm ontwikkel.
Binnelangs
Waar die vorige XC60 te hard probeer het om saam met sy Duitse mededingers te draf, is sy opvolger ’n toonbeeld van stille selfvertroue. Driepuntsterre en blou-en-wit propellers neig om die slegste in hulle bestuurders uit te bring, maar die XC60 se binneruim is so ontspanne, wel, soos ’n Sweedse masseersalon.
Die Volvo se instrumentepaneel herinner jou aan daai Deense hoëtroustelle met die moeilike name of ’n slimfoon met ’n raakskerm teenoor die Duitsers se obsessie met knoppies. >
Alles in die binneruim sê “minimalisties en gesofistikeerd”. ’n Negeduim- vertikale raakskerm beheer omtrent al die motor se funksies – trouens, die enigste fisieke knoppies is om die klankvolume te beheer en die voor- en agterruit te ontwasem. Dat alles met die veeg van ’n vingerpunt beheer moet word, is egter ’n tweesnydende swaard, want elke funksie lê versteek binne ’n onderafdeling wat jou twee keer laat dink as jy nou net wegneembraaihoender geëet het.
Aan die ander kant is die afwesigheid van ’n oormaat knoppies kalmerend en kenmerkend van die Volvo se gerusstellende persoonlikheid.
Die intreeweergawe, die Momentum, het elektriese leersitplekke, LED-koplampe, ’n panoramiese sondak en ’n dakrak standaard, terwyl die R-Design- en Inscription-model oor omvattender veiligheids- en toerustingvlakke beskik.
Agter die stuur
Die XC60 is ratser op sy voete as sy voorganger. Deels weens sy laer daklyn- en gepaardgaande sitplekposisie (meer soos dié van ’n motor as ’n sportnuts) en ’n grondvryhoogte van 216 mm, 15 mm laer as tevore.
Beskikbare wielgroottes wissel van 18 duim tot 22 duim en daar is opsionele lugvering – aan te beveel vir enigiets groter as 19 duim, of vir Johannesburgers!
Die petrolenjin se syfers lyk op papier belowend, maar wat trekkrag en doeltreffendheid betref, gaan jy in die praktyk diesel verkies. Eersgenoemde begin ook raserig raak wanneer jy baie van hom vra, terwyl die diesel hom meestal bedeesd (en vibrasievry) gedra.
Slotsom
Jy koop allermins ’n Volvo om te spog. Jy koop hom omdat jy vrede binne jouself én met die wêreld het. ’n Land Rover Discovery Sport is ’n vaardiger veldryer; ’n Mercedes GLC sportiewer, en ’n Jaguar F-Pace mooier. Maar nie een van hulle verpersoonlik klasleidende veiligheid, ruimte, gehalte en sofistikasie soos die Volvo nie.
Vanweë goeie gene kan die XC60 jou moontlik verveel, hoewel dit eintlik ’n kompliment is, bloot omdat hy elke keer jou stratosferiese verwagtinge met so min moeite oortref. Volvo mag dalk sedert 2009 aan die Chinese motormaatskappy Geely behoort, maar die XC90 het voorbrand gemaak vir die XC60 om Swede se nuwe beste uitvoerproduk te word. Ja, dalk selfs beter as ABBA.
Pryse en modelle
Die nuwe XC60 word eers in die middel van 2018 plaaslik bekend gestel. Pryse sal ook eers dan bekend gemaak word. Elke enjinsoort – die D4, D5, T5 en T6 – kan in elkeen van die afwerkings – Momentum (basismodel), R-Line (sportief ) en Inscription (luuks) – bestel word.