Fyn, pikkewyn!
Haak vir die naweek af by die klein Millers Point-woonwapark, kyk pikkewyne en walvisse, maak ’n draai by Kaappunt en koop vars snoek vir die rooster.
Halfpad tussen die vlootdorp Simonstad en Kaappunt lê die Millers Point-woonwapark aan die Valsbaaise kus. Hier op jou staanplek, teen ’n hang reg bo die see, kyk jy ver en wyd oor Valsbaai uit – op ’n mooiweersdag kan jy 30 km ver oor die see sien tot doer by Valsbaai se ander punt, Kaap Hangklip.
Naby die woonwapark lê die kusdorpe ingeryg: Simonstad met sy ryk seevaart- en vlootgeskiedenis, Vishoek, Kalkbaai, Muizenberg... Jy is net om die draai van ’n rits museums, die wêreldbekende Boulderspikkewynkolonie en Kaappunt. En die Kaapse middestad is skaars 50 km van die kampplek af.
Die linksafdraai na die woonwapark is 5,6 km suid van Simonstad, langs die mooi M4-roete wat berg- en seelangs in die rigting van Kaappunt kronkel.
Dis een van die Stad Kaapstad se kampplekke, maar moenie skrik omdat dit ’n munisipale oord is nie. Anders as soveel ander munisipale kampplekke in die land wat erg agteruit gegaan het of feitlik tot niet is, word Millers Point goed onderhou. Hier is ook slegs 16 staanplekke, wat dit oor besige langnaweke een van die rustiger kusoorde maak.
Mik vir nr. 16
Die staanplekke in die klein omheinde boskampplek lê op twee terrasse langs die see, en agter die kampplek troon die berg bo die M4-hoofpad uit. Tussen die staanplekke loop ’n ovaalteerpad deur.
Staanplek 16 is ongetwyfeld die gewildste onder die kampeerders, sê die vriendelike Nicolene Adams, wat die besprekings hanteer.
Dié staanplek is een van drie wat op die onderste terras in ’n ry langs mekaar en sowat 100 m bo die see lê.
Oorkant die drie seestaanplekke, in die kring van die ovaalpad, is nege staanplekke in twee rye langs mekaar. Die ander vier staanplekke is op die boonste terras in ’n ry langs mekaar, langs die kampplek se klein ablusieblok.
Staanplek nr. 16 is ’n goeie 12 x 10 treë – een van die groter staanplekke in die kampplek. Die staanplekke is nie ewe groot nie, en op van hulle is ’n boom of twee wat dit onmoontlik maak om ’n groot wa in te trek. Gesels maar voor die tyd met Nicolene-hulle om seker te maak die plek wat jy kry, is reg vir jou wa en tent.
In die middel van die kampplek is twee stelle betontrappe met staalrelings van die onderste na die boonste terras, maar die wal is nie so steil nie en jy kan eintlik maar sommer daarteen uitstap badkamer se kant toe.
Bring jou braaier
Op die meeste staanplekke in dié boomryke kampplek is lekker koelte en jy het ’n kragpunt (gewone driepunt) op jou staanplek. Jy kamp op groen gras met hier en daar ’n grondkol. Wat jy nié op jou staanplek het nie, is ’n braaiplek.
Op die boonste terras is drie geboude braaiplekke langs mekaar, maar hulle is nie op die lekkerste plek nie en reg langs die badkamers. As die kampplek vol is, moet jy ook jou braaibeurt afwag. >
Bring dus maar jou eie braaier saam sodat jy lekker en in vrede op jou staanplek kan braai.
Jy het ook nie ’n vullisdrom op jou staanplek nie. Die vullisdromme word agter slot en grendel gehou in ’n baksteenvertrek by die ablusieblok, want die bobbejane is lastig hier. Neem maar die waarskuwingsborde teen die Skiereiland se kese ter harte, want elke dan en wan sak ’n trop soos rowers op die kampplek toe. En dan verg dit dikwels ’n amptenaar met ’n verfbalgeweer om hulle te verdryf.
By die voorste staanplekke is ’n kraan, maar al die staanplekke is naby genoeg aan die ablusieblok en opwasplek om gou te gaan koffiewater tap.
Nuut geteël
In die klein rooibaksteenablusieblok is aparte badkamers vir mans en vroue. Die badkamers, wat onlangs nuwe teëls gekry het, is basies maar gerieflik en die kampplek se personeel maak dit elke oggend silwerskoon.
Elke badkamer het twee storte met droë hokkies en houtbankies, vier wasbakke, drie toilette en hang- en pakplek vir klere en badgoed. In die vrouebadkamer is ook ’n badhokkie.
Mans wat bad bo stort verkies, kan ook in ’n lekker warm bad inklim. Hier is twee aparte badvertrekke in die ablusieblok, maar die een is op ’n effens vreemde plek; reg by die opwasbakke in die opwaskamer. (Daar is darem ’n deur tussen jou en die mense wat by die vier opwasbakke skottelgoed was.) Die ander badvertrek is aan die ablusieblok se agterkant, by ’n binnehof met ’n lang wasgoeddraad, ’n klerewasplek met drie diep wasbakke, en die hok waar die vullisdromme staan.
Seewaarts
By die kampplek klim jy met betontrappe af na ’n lang, groen grasterras reg langs die see. Op dié terras, reg onder die kampplek se seestaanplekke, is ’n groot houtklimraam en swaaie waarop die kinders kan baljaar.
Die kusstrook hier is hoofsaaklik rots, maar sowat vyf minute se stap met die grasterras langs bring jou by ’n klein baaitjie waar jy kan swem en op die klein wit strand kan sonbaai of jou boek in die koelte van massiewe rotse kan lees. Nog vyf minute of wat se stap verder is die Millerspunt-boothelling. Hierdie geweste is ’n gewilde diepseehengelplek, maar die boothelling is ook ’n gawe plek om jou kajak te water te laat én gewild onder skubaduikers.
Die kampplek het nie ’n swembad nie, maar die Millerspunt-getypoel – een van die Kaap se lekkerste getypoele – is ’n kwartier of wat (1,1 km) se stap van die kampplek af. Jy kan hier ook braai of piekniek hou.
Pikkewyne by dosyne
Sowat 4 km van die kampplek af, net voor jy Simonstad inry, is die wêreldbekende Boulders-pikkewynkolonie. Dié gedeelte van die Tafelberg- nasionale park is die tuiste van ’n stuk of 2 200 Afrikapikkewyne. Jy stap hier met houtpaadjies langs die see en in die bos – en die pikkewyne is volop. Jy sien hulle ook van baie naby. Inligtingsborde langs die pad
vertel jou meer oor dié bedreigde voëls. Die enorme gratnietboulders is ook iets om te aanskou.
Nog sowat 2 km se ry verderaan is jy in Simonstad met sy ryk seevaart- en vlootgeskiedenis. Gaan draai by die Simonstaden Vlootmuseum en gaan draai by Percy van Zyl se speelgoedmuseum in die hoofstraat. Dié museum bestaan al 62 jaar en het ’n versameling van 4 500 karretjies, >
1 500 poppe, ’n enorme werkende treintjie-uitstalling en ’n klomp ander speelgoed van toeka tot nou (toegangsgeld is R10 p.p. en R5 vir kinders).
By die Simonstadse hawe kan jy die visserskuite, seiljagte en vlootskepe gaan bekyk. Gaan wys ook vir die kinders Kaappunt (19 km van die kampplek af); Dit kos R135 p.p. (R70 vir kinders).
Van Junie tot November is Millerspunt ook ’n goeie plek om walvisse te kyk. Noorkappers maak die westelike gedeelte van Valsbaai dan hulle tuiste.
’n Uitstappie na die Kalkbaaise hawe (15,7 km van die kampplek af) is ook die moeite werd.
Hier kan jy deur die dag kyk hoe die vissersbote met die dag se vangs van die diepsee af terugkeer en die mak robbe op die hawemuur beloer en afneem. En vir R80-R100 kan jy vir jou ’n groot vars snoek koop vir die kampvuur.