NEELS SE STOEPTENT
Hy het ’n klompie plekke geïdentifiseer waar oornagplekke vir slepers reeds bestaan óf waarvan die ligging goed is daarvoor, sê Neels van Heerden.
Duisende gesinne sleep elke jaar oor langnaweke en skoolvakansies kus toe. Met ’n woonwa op die haak is oorde in KwaZulu-Natal van Gauteng af ’n rustige dagreis ver. As jy vroegdag al by Scottburgh, die Dolphin-oord of Mac Nicol’s wil aankom en jou wa rustig en sonder haas haaks trek voor jy die sytent opslaan en dan ’n koel lafenis geniet terwyl die kinders soos mis voor die son verdwyn, moet jy nét na middernag uit die Goudstad wegtrek.
Die reis Oos- of Wes-Kaap toe vereis gewoonlik dat julle êrens moet oorslaap. Ek sien gereeld op sosiale media hoe slepers ’n veilige oornagplek soek wat nie “’n plaas se prys” kos nie.
Ek glo die vernaamste vereistes vir sulke plekke is veiligheid, goeie ablusiegeriewe, die ligging en die gehalte van die staanplek self.
Die meeste woonwaens is taamlik beknop binne-in wanneer ’n mens op pad is – al die laaste goeters wat nie in die sleepvoertuig ingeprop kon word nie, moet mos hier in. Waar slaap Ouma, Sus en Daan dan? Juis daarom is slaapplek in ’n chalet dikwels nodig. Pa of Ouboet slaap dan in die wa vir ekstra veiligheid.
Die vraag is daar, maar hoe lyk die aanbod van veilige en bekostigbare oorstaanplekke?
’N PETROPORT IS ’n puik plek om bene te rek, brandstof in te gooi en iets te snoep te kry. Dis in elk geval ’n goeie gewoonte om elke 250 km te stop en die sleepkombinasie na te gaan – te kyk of die woonwa se wielmoere nog styf vas is en al die ligte werk.
Die bestaande sakemodel vir petrolporte is ’n kombinasie van ’n spesifieke brandstofhandelsnaam en ’n spesifieke kitskosrestaurant as ’n franchise. Blykbaar was dit nog nooit deel van die bekende franchises se beplanning om oorslaapgeriewe te vestig nie. Ek kon ook nog glad nie enige navorsing opspoor wat die lewensvatbaarheid en winsgewendheid van ’n oorslaapopsie by petroporte ondersoek het nie.
Die afgelope Desembervakansie was dit vir my opvallend hoe die geriewe by ’n gevestigde petroport in die KwaZulu-Natalse Middelland agteruitgegaan het.
Vervalle geboue en geriewe skep ’n swak beeld vir enige maatskappy – des te meer nog as duisende toeriste jaarliks jou instelling besoek. Ek wil beslis nie by só ’n vervalle plek oornag nie.
’n Nuwe ontwikkeling tussen Warden en Villiers, 250 km van Pretoria af en reg langs die snelweg, is ’n besienswaardigheid waar jy ook kan bene rek. Onderhandelings is aan die gang om oornaggeriewe vir woonwaens en veral ryhuise te vestig.
’n Soortgelyke ontwikkeling is ook nodig iewers tussen Estcourt en Pietermaritzburg. Howick se munisipale kampplek het al jare gelede tot niet gegaan, en die Midmardam is omtrent die enig- ste opsie naby Pietermaritzburg. By Harrismith is daar ’n kampplekkie in private besit. Dis reg langs die snelweg en stapafstand van heelparty eetplekke af.
MAAR WAT VAN ander roetes? Ek het ’n padkaart beloer en ’n klompie plekke geïdentifiseer waar oorstaanplekke reeds bestaan of waarvan die ligging goed is daarvoor. So ’n plekkie hoef net vyf staanplekke te hê. Op pad Kaap toe is ’n vreeslike oulike plekkie net noord van Britstown. In en om Bloemfontein en Beaufort-Wes is ’n hand vol moontlikhede, en tussen Jamestown en Queenstown is daar vir mense wat Oos-Londen toe mik, ’n opsie op ’n plaas naby aan die teerpad.
Onder in Schoemanskloof is ’n kleinerige vulstasie-en-winkelkompleks wat dag en nag oop is. Hier kan ’n paar staanplekke ontwikkel word vir mense wat rusplek soek op pad na die Krugerwildtuin toe.
Wat franchises betref... Wat van ’n handelsnaam soortgelyk aan dié van die Automobiel-Assosiasie vir verblyf? My idee is dat goedgekeurde oornagplekke dan ’n bordjie kan hê met iets soos “Weg Ry
& Sleep Aanbevole Oornagplek” daarop. Ek is bereid om die kriteria in samewerking met lesers van die tydskrif op te stel. Kampeerders wat hierdie kuipe aandoen, sal elke keer ’n kort anonieme verslaggie skryf om seker te maak die standaarde word gehandhaaf. Wat dink jy daarvan?
Kampeerders wat hierdie kuipe aandoen, sal elke keer ’n kort anonieme verslaggie skryf.