DIS TYD VIR ’N HUIS-OP-WIELE

Ons tyd vir die voltydse kamplewe het aangebreek – tyd om die pad te vat na die bekende en onbekende. ’n Mens is opgewonde, maar jy wonder tog oor so ’n besluit.

Kamp is egter in my en my man, Pieter, se bloed en ons skrik nie vir dít wat op ons wag nie. Die kinders het al opgegee om ons van ons plan te laat afsien, want ons gaan beslis kamp.

Eers wag daar groot uitdagings en beplanning. Ons moet al ons besittings – ook ons huis – verkoop. Ten minste het ons reeds in ’n groot en gerieflike woonwa belê. Ons Sensation-wa het baie pakplek, maar ’n mens moet nietemin mooi kies wat saamgaan. Alles gaan oor gewig.

Dan dink jy aan die reiskoste, veiligheid, versekering én, baie belangrik, ons sleepvoertuig. Ons Chevrolet Trail- blazer staan reg vir die sleep.

Ons samel maande lank al inligting in oor bekostigbare kampplekke met afslag vir pensioentrekkers. Ons wonder hoe dikwels ons die kinders, en veral die kleinkinders, sal sien. Wat gebeur as ons gesondheid agteruitgaan?

Maar ná al die jare is dit tyd om ’n slag aan onsself te dink. Dis soos ’n eerbetoon aan ons erfenis; om die aarde te waardeer en ’n persoonlike verhouding met die natuur aan te knoop. Dis die tyd om alles wat mooi is te beleef, en dit oortref wat ons agterlaat. ’n Mens moet die geleentheid aangryp voor die tyd jou inhaal.