Kom ontspan ’n slag
Dié lappie aarde met sy dertig stuks staanplekke op die oewer van die Vaalrivier is een van daardie plekke waar jy met mening kom ontspan. Hier, aan die Noordweskant van die Vaal, wéét jy nie van die stad se geraas nie. Dis net jy en jou mense en die rivier wat rustig voor jou verby seil. Onthou ook om jou verkyker en voëlboek saam te bring sodat jy geveerdes soos die witreier en die bontkiewiet op jou lysie kan aftik.
Hier kry jy nie waterwurms en ’n ontspanningsaal nie. Jy kom hierheen vir die natuur en die rustigheid. Maar dit is allermins te sê Eastco is nie gesinsvriendelik nie. Dit is eerder ’n plek waar julle as gesin dinge saam doen.
Jy kamp op ’n groterige kampterrein met staanplekke wat teen die water uitgelê is. Die voorste staanplekke is eerste prys – probeer om jou naam langs nr. 17-20 te kry wanneer jy bel om te bespreek, want dié staanplekke is aan die regterkant van die kampterrein en ook die naaste aan die water. As dié vier reeds bespreek is (en dis ’n sterk moontlikheid, want die oord is baie gewild), vra vir nr. 5-10. Hulle is ook voor, maar ’n entjie verder van die water af. Die res van Eastco se 32 staanplekke lê agter die voorste ry – as jy hier kamp, gaan jy ongelukkig in kampeerders voor jou vaskyk terwyl jy onder jou stoeptent sit.
Elke staanplek het ’n betonblad waarop jy jou wa kan trek, en die meeste van hulle het ’n staalraam met ’n skadunet bo-oor. Dié koeltemaker staan hoog genoeg sodat ’n Exclusive kan inpas én daar is genoeg plek vir ’n voltent en ’n kar op jou staanplek. Jy kry jou eie kragpunt met ’n gewone huissok. (Die kragboks het jou staanpleknommer op.) Van die kragbokse, veral dié op staanplek nr. 17-19, is laag op die grond en het nie ’n deurtjie wat oopmaak of ’n flap wat oplig nie. Jy moet dus op jou knieë gaan om jou verlengkoord in te prop.
Jy kry ook jou eie kraan en geplante staalbraaier met ’n kolebak, én ’n rooster waarvan jy die hoogte kan verstel. Enkele van die staanplekke het nie ’n geplante braaier nie, maar by hulle is daar losstaande staalbraaiers.
Die skadunet is ’n groot bederf, maar selfs al kry jy nie een nie, is hier veral op die staanplekke teen die oewer heerlike koeltebome vir skuiling teen die son.
Die kampterrein is pynlik netjies. Oral is gras, daar is genoeg plek tussen jou en die buurman, en die oordpersoneel het klaar jou leivoortjies oopgegrawe vir wanneer dit reën. Maak net mooi seker waar die voortjies loop, want as jy nie kyk waar jy trap nie en jy beland in een van hulle, kan jy maklik jou enkel swik.
Susan Steenkamp, die oordbestuurder, kom loer daagliks in om te hoor of alles in orde is en of jy iets kortkom.
Watersake
Hier is een ablusieblok met aparte geriewe vir mans en vroue. Binne is die siersteengebou van die vloer tot die plafon geteël. Aan die regterkant is die waskamer met drie skottelgoedwasbakke en een klerewasbak. Hier staan ook
Jy kamp op ’n groterige kampterrein met staanplekke wat teen die water uitgelê is. Die voorste staanplekke is die eerste prys.
’n dubbelbalie- én bolaaiwasmasjien plus ’n tuimeldroër. (Jy het nie ruilmunte nodig vir die masjiene nie.) Jy kan ook jou vleis en ys in die ys-vrieskas kom bêre as jy nie sulke geriewe op jou staanplek het nie. In die badkamer is ses wasbakke – drie elk aan weerskante van die deur. Elke wasbak het sy eie spieël, maar net die middelste twee het ’n lang spieël. As jy dus by een van die ander vier beland, gaan jy moet buk as jy wil sien wat jy doen terwyl jy skeer. Agter die wasbakke is twee rakke en handeseep. Hier is vier stortkamers. Hulle is heerlik groot, skoon en netjies. Die stort sit in die verste punt van die kamer en het ’n glasskuifdeur. In die droë deel is hake agter die deur en teen die muur een van daai plastiekstoele wat jy in ’n kerksaal aantref. Jy sukkel dus nie om jou goed droog te hou nie. Hier is een urinaal, ’n badkamer met ’n wasbak en spieël, en vier toilette. Die geriewe word deurentyd skoongehou. >