Iets vir almal
Soos met die meeste gewilde kampplekke in dié geweste moet jy vroeg spring as jy jou staanplek by die Umfula-oord op die Fochville-pad in Noordwes wil bespreek.
Elkeen van die 38 staanplekke op die boomryke rivieroewer is oor langnaweke en skoolvakansies ’n gesogte stukkie grond. Dit is effens meer van ’n gesinsoord as Eastco, en terwyl Pa lyn natmaak of met sy waterponie in die rivier speel en Ma ’n welverdiende middagslapie vang, is hier verskeie doendinge waarmee die kinders hulle besig kan hou. Hier is ’n klouterraam, vlugbalbaan, trampolien en minigholfbaan, en oor naweke word hier selfs ’n springkasteel vir die kleintjies opgeblaas.
Wanneer die son warm bak, kan jy saam met die kinders in een van drie swembaddens gaan afkoel. Wel, dalk nie in die kinderswembad nie, maar beslis in een van die ander twee.
Die genommerde staanplekke is hoofsaaklik op ’n dik mat gras uitgelê en is in die skadu van groot koeltebome. Daar is egter ’n hand vol staanplekke wat só goed teen die son beskut is dat daar nie gras groei nie. Met ’n klompie ander staanplekke is die teendeel egter waar: Hier is genoeg gras, maar nie veel koelte nie. Gesels met die persoon aan die ander kant van die lyn wanneer jy bespreek, en hoor of dit nodig gaan wees om jou silwerseil en gazebo saam te bring. Pak in elk geval genoeg sonroom in, want dit kan erg warm raak hier, veral as jy heeldag langs die viswaters sit. >
As jy hierheen kom om te hengel, probeer jou staan kry op die oewerstaanplekke (nr. 11-15). Hier kan jy amper van jou stoeptent af ’n karp of baber aan jou hoek probeer kry. Die lanseerplek vir jou boot is regs van dié staanplekke.
As jy ietwat meer privaatheid verkies en nie omgee om ’n bietjie verder te stap ablusieblok toe nie, kan jy vra of staanplek nr. 10 en 34-38 nog beskikbaar is. Hier is jy eenkant van die res van die kampterrein en so te sê op die water, maar die koelte is skraps.
Die staanplekke wissel in grootte en van hulle is nogal knap, veral as jy met ’n groot wa kom kamp. Die staanplek waarop ons gekamp het (nr. 29) is net 7 treë breed. Genadiglik het ons net ’n tent, gazebo en klein ryhuis gehad. Die meeste van die staanplekke lê ook teen ’n effense skuinste, en dit is net die staanplekke teen die water wat mooi gelyk is. As jy met ’n wa kamp, sal jy hom met jou neuswiel en hoekstutte waterpas kan kry, maar kyk mooi waar jy opslaan as jy met ’n tent kom.
Jy het nie jou eie braaier op jou staanplek nie, maar hier is vier gemeenskaplike braaiplekke waar jy jou sosaties kan gaar kry. Dié baksteenbraaiers het agt braaiplekke (vier aan elke kant), elk met sy eie rooster. As jy verkies om lekker voor jou wa te braai, mag jy jou eie braaier saambring.
Jy deel jou blousokkragpunt met jou bure – onthou om ’n verlengkoord van minstens 20 m saam te bring. Afhangende van waar jy staan, gaan jy moontlik ’n entjie tot by die naaste kraan moet stap as jy water nodig het.
Skrop jou skoon
Umfula se een ablusieblok is so te sê in die middel van die oord en hier is aparte geriewe vir mans en vroue. Die siersteengebou het gasgeisers wat vir warm water sorg – daar’s dus geen kans dat jy koud gaan stort as dit druk besig is nie.
Die storthokkies is klein en dit is nogal ’n storie om jou droë goed te probeer droog hou. Daar is hake agter die houtdeur, maar geen gordyn tussen die stort en aantrekdeel nie. As jy kan – en jy druk nou nie voor iemand in ’n rolstoel in nie – probeer in die rolstoelvriendelike stort-
kamer was. Dit is aansienlik groter en hier is meer pakplek vir jou klere.
Links van die deur is die urinale en die wasbakke met ’n groot spieël die muur vol. Agter die wasbakke is ’n houtbank waarop jy kan sit om jou veters vas te maak of jou beurt af te wag as dit vroegoggend bedrywig is.
Die opwasplek is aan die linkerkant van die gebou. Hier is twee vlekvryestaalwasbakke vir skottelgoed en twee klerewasbakke om die visreuk uit te was.
Wat’s die ‘score’?
Wanneer dit amper afskoptyd is op Twickenham, kan jy en jou swaer julle verskoon en in die rigting van die hoofhek beweeg. Hier is die onspanningsdeel, en in die kroeg langs die ontvangskantoor is ’n grootskermtelevisie waar jy vir (of op) die Bokke kan skree.
Buite op die stoep wat oor die swembad en speelparkie uitkyk, kan jy die vleis op die kole gaar kry en die kinders in die water dophou. >
Die staanplekke wissel in grootte en van hulle is nogal knap, veral as jy met ’n groot wa kom kamp.