Jou eie plekkie
Die Casa Cara-lodge lê aan die Vrystaatse kant van die Vaalrivier, op ’n plaas in Sasolburg se rigting. Hier het hulle pas teen die rivier 13 staanplekke vir kampeerders bekend gestel. As die idee van ’n wegkruipplek langs die viswaters met private geriewe in jou kraal val, is dit die plek waarheen jy volgende kan mik.
Hoewel Casa Cara se eintlike fokus op troues en ander gesellighede is, skeep hulle nie die kampeerders af nie. Trouens, al die geriewe wat vir chaletinwoners beskore is, is ook beskikbaar vir jou gebruik wanneer jy hier kamp. Dit sluit die kleurryke speelparkie, klein dieretuin, restaurant en swembad in.
Ons het met die oordbestuur gesels, en dit klink of daar vroeër eerder as later ook ’n swembad en speelparkie by die kampterrein opgerig gaan word.
Jou staanplek word vooraf aan jou toegeken, en wanneer jy by die ontvangskantoor opdaag, kry jy die sleutel vir jou badkamer nadat jy die papierwerk afgehandel het.
Die staanplekke lê op ’n streep op die rivieroewer en is duidelik genommer met ’n plaatjie wat teen die badkamergebou vasgeskroef is. Staanplek nr. 1 en 11 is die grootste van die lot en jy kan vir hulle vra as jy met ’n dubbelaswa kom kamp. Die ander staanplekke is min of meer ewe groot en jy slaan jou kamp op ’n geplaveide blad op.
Hier is geen afskorting tussen jou en die bure nie en sake is dus nie hééltemal privaat nie. Jy kan natuurlik altyd met jou wa se rugkant na die bure toe staan en jou tent dan in die rigting van die badkamer opslaan.
Die staanplek lê hoër as die rivier, maar onder teen die water is vir elkeen ’n stukkie grond skoongemaak waar jy jou met jou visgerei kan kom tuismaak. Die paadjie ondertoe kan glad en modderig raak wanneer dit reën, en dit is veral ’n uitdaging om weer op te klim.
Voor die staanplek staan jou baksteenbraaier met sy rooster. Die staalraamwerk waarop die rooster rus, is aan die braaier vasgebout en jy kan hom nie uithaal nie. Langs die braaier is ’n wasbak met ’n kouewaterkraan.
Jou private badkamer is basies met ’n stort, toilet, wasbak en spieël, maar dis nog splinternuut en netjies. Die stort
is ruim genoeg dat die stortgordyn nie aan jou lek nie. Die gasgeiser sorg vir jou warm water, en omdat elkeen sy eie een het, is die water heerlik warm wanneer jy stort.
Aan die buitekant van die ablusieblok sit jou kragpunt (twee gewone huissokke) en ’n warm- en kouewaterkraan. Die skottelgoedwasbakkie wat onder dié krane hoort, is reeds bestel en sou volgens die bestuur binne weke opgerig word. Dit sal die prentjie mooi afrond.
Kom sit aan
As jy die aand nie lus voel om self kos te maak nie, kan jy by die lodge se restaurant gaan aansit. Dié eetplek is nogal iets om te sien: Dit is op én in ’n varswaterdam gebou, en die houtgebou het etlike vertakkings waar dit voel of jy op die water sit. Terloops, jy kan ook jou visstok bring en in die einste dam kom lyn natmaak. Laat net weer daai karp en baber vry wat jy aan jou hoek kry.
Die kinders se speelparkie is ewe indrukwekkend. Hulle kan dus na hartelus speel terwyl jy met ’n koel lafenis ontspan. Hier is ook ’n klein dieretuin met onder meer hasies, fisante, hoenders, poue en ’n verskeidenheid bokke.
As julle in dié rigting kom, onthou sommer om die swemvlerkies en tjoepies ook saam te bring, want die swembad is in dié deel van die oord geleë.