REDAKTEURSBRIEF
Dis Juliemaand en hierdie diepwinter waarin ons ons bevind, is onaangenaam, om die minste te sê. Ja, ek weet daar is mense wat ’n bekoring in die koue sien en liries raak oor ’n snoesige kaggel- of kampvuur, ’n warm bredie en ’n groot glas ordentlike rooiwyn of glühwein, maar ek is beslis nie een van hulle nie.
Dit grens vir my aan menseregteskending as my wekker begin skree terwyl dit nog stiknagdonker is. En nadat ek uiteindelik twee keer ge-snooze, myself uit die bed geskeur en met moeite klaargemaak het, het ek die onaangename taak om my 7-jarige dogter uit die bed uit te jaag. Dis ’n wrede besigheid, want hoe verduidelik jy vir haar sy gaan laat wees vir skool terwyl sy self kan sien dis nog donker buite?
Teen die tyd dat jy terugkom van die werk af, is dit wéér donker. Nee dankie, hou maar jou kaggel, bredie en glühwein vir jouself. Daardie laataandkool is die vroegoggendsous nie werd nie.
Dit is ongelukkig die meeste van ons se lot, maar daar is tog ’n tikkie verligting in die vorm van ’n amper maand lange skoolvakansie wat ’n mens kan gebruik om van die winter te ontsnap na dele van ons land waar die weergode jou oor dié tydperk meer genadig is.
Die kus van KwaZulu-Natal is een só ’n streek, en ons het vir Zigi afgevaardig om in die omgewing van Margate drie kampplekke te besoek. Hier kan jy, selfs in Julie en Augustus, in jou swembroek, T-hemp en plakkies ontspan en die kinders in die see baljaar. Op ’n plek soos dié voel ’n Gautengse winter ’n leeftyd ver.
Die Wildekus is ook ’n goeie winterbestemming om met jou veldryer aan te durf en ons het vir Evan noordwaarts op die Wildekus-4x4-ekoroete gestuur om die wêreld van Keimond tot Port St. Johns te verken. Hy het teruggekom met heelwat inligting oor weggesteekte strande, agterpaaie, natuurreservate en kusdorpies.
Moet dus nie dat die winter jou onderkry nie. Haak jou wa, pak jou veldryer en sê vir jou GPS om jou die pad kuswaarts te beduie.
Veilige reis!
Kyk, ’n donkie voel nou maar eenmaal ’n veer vir ’n aankomende voertuig. Hy sal nie eens ’n wenkbrou lig nie, wat nog te sê ’n poot om uit jou pad te kom.