Beplan jou avontuur vir 2019!
Kry jou kalender en beplan jou volgende selfryavontuur saam met Weg Ry & Sleep en Bhejane 4x4 Adventures.
1 KALAHARI-KGALAGADI
DATUM 31 Januarie tot 7 Februarie 2019 VERBLYF Tente PRYS R11 000 p.p. (BTW uitgesluit)
Besoek Mabenyani a Kalahari (“Juweel van die Kalahari”), ’n konsessiegebied van 4 miljoen hektaar in Botswana, en Mabuasehube in die Kgalagadi-oorgrenspark. Neem ’n leeu af nadat jy die diere saam met Boesmanspoorsnyers opgespoor het. Bring jou verkyker en geniet die Kgalagadi se voëlrykdom: breëkop-, roof- en swartborsslangarende, berghane én migrerende roofvoëls soos die skaars gevlekte arend.
2 LESOTHO-BAKENS
DATUM 11-16 Maart 2019 VERBLYF Lodge en gastehuis PRYS R8 950 p.p. wat deel (geen BTW gehef )
Dié avontuur strek oor 6 dae en neem jou van oos na wes deur Lesotho. Beleef die Sanipas, die hoogste grondpad, grootste dam en hoogste ononderbroke waterval in Suider-Afrika, asook ’n besoek aan die geboorteplek van die Basothonasie.
3 DRIE LANDE: KRUGERWILDTUIN, SWAZILAND EN MOSAMBIEK
DATUM 26 Mei tot 6 Junie 2019 VERBLYF Tente en strandlodge PRYS R12 350 (geen BTW gehef )
Ons avontuur begin met drie nagte in die sentrale en suidelike deel van die Krugerwildtuin, met een van dié aande langs die park se unieke private 4x4-roetes. Daarna mik ons vir Swaziland. Ons kamp in die westelike hoogland, besoek die Malolotja-natuurreservaat en kulturele en historiese besienswaardighede. Dan mik ons vir Ponta Malongane in Mosambiek waar ons drie nagte bly: Ry boot, snorkelduik en geniet die seekos.
4 TRANS-BOTSWANA: CAPRIVI, CHOBE, VICTORIAWATERVAL
DATUMS 13-23 April, 18-28 Junie, 9-19 Augustus en 9-19 September 2019 VERBLYF Tente PRYS R12 990 p.p. (BTW uitgesluit)
Ons begin in Lethlakane in die suide van Botswana en eindig in Kasane in die noorde. Tussenin lê ’n reis vol geografiese wonders deur die Makgadikgadipanne, eens die diepste deel van ’n reusemeer, die suide van die Okavangodelta en die Okavangorivier tot in die Zambesistreek (Caprivi) deur die Tsodilokoppies. Dan besoek ons die Choberivier en die wêreldbekende Victoriawaterval.
5 NAMIBIË SE WOESTYNRIVIERE
DATUM 1-12 Augustus 2019 VERBLYF Tente PRYS R15 750 Kaokoland se woestynriviere is ’n eiesoortige deel van Namibië se noordweste. Hier sal jy die skaars woestynolifante en talle ander dieresoorte sien. Kaokoland is vol verrassings, met ’n ryke natuurskoon vol unieke fauna en flora.
6 PONDOLAND-PARADYS
DATUM 6-10 Mei 2019 VERBLYF Strandlodge PRYS R7 850 p.p. wat deel (geen BTW gehef )
Hierdie is ’n reis langs die ongerepte kus van die ou Transkei, ’n landelike omgewing waar
die Xhosas nog op die tradisionele manier leef. Ons verken die kuslyn langs baie kilometers wettige tweespoorpaadjies en sien skeepswrakke, ongerepte strandmere en kristalhelder watervalle. Ons besoek ook die bekende Hole in the Wall en Koffiebaai.
7 ZOELOELANDBEWARINGSWONDER
DATUM 18-26 Mei 2019 VERBLYF Tente PRYS R11 350 p.p. (geen BTW gehef )
Reis saam met ons van die Hluhluwe-iMfolozipark, die oudste bewaringsgebied in Afrika en die plek waar die swart- en witrenoster van uitwissing gered is, na die iSimangalisovleilandpark, die grootste strandmeerstelsel in Afrika en ’n Wêrelderfenisterrein. Ons sien skouspelagtige uitsigte en ervaar die geskiedenis terwyl ons die voormalige koninkryk van die Zoeloekryger koning Shaka deurkruis.
8 TRANS-CAPRIVI-SKATTE: KHAUDUM, MAMILI, LINYANTI
DATUM 15-25 Augustus 2019 VERBLYF Tente PRYS R15 750 Kom reis saam met ons deur Boesmanland na die waters van die Okavangodelta en die Linyanti-moerasse. Op pad stap ons op die spoor van Boesmangidse en besoek die Khaudum-, Bwabwata- en Mamili- nasionale park. Ons ry ook deur die Zambesistrook (Caprivi), waar wild volop is.
9 ETOSHA: DAMARALAND EN DIE SKEDELKUS
DATUM 14-25 September 2019 VERBLYF Tente PRYS R12 900 p.p. (BTW uitgesluit) Ons toer begin op Swakopmund waar ons ’n paar avontuuraktiwiteite gaan ervaar. Van hier af mik ons noord na die Brandberg, ry deur die Skedelkus- nasionale park, bring tyd deur in Damaraland se rotswoestyn en kyk vier dae lank wild in die Etosha- nasionale park.
10 SWAZILAND
DATUM 3-9 November 2019 VERBLYF Tente PRYS R8 850 p.p. (BTW uitgesluit)
Beleef die vriendelike kultuur en natuurskoon van die Koninkryk van Swaziland, van die Ezulwinivallei deur die Laeveld rondom Hlane tot bo in die berge rondom Phophonyane. Hierdie reis beloof veelsydige natuurskoon, lieflike uitsigte en ’n kennismaking met een van Afrika se vriendelikste kulture.
11 LIUWAVLAKTE-WILDEBEESMIGRASIE EN KAFUE
DATUM 1-12 November 2019 VERBLYF Tente PRYS R17 300 p.p. (BTW uitgesluit)
Ons roete begin op Katima Mulilo in Namibië en eindig in Livingstone. Ons ry al langs die Zambesirivier en verby die Siomavalle, dan oor die Barotse-vloedvlakte en deur die dorpie Kalabo na die Liuwavlakte- nasionale park. Hier ervaar ons die naasgrootste wildebeesmigrasie in Afrika. Daarna besoek ons die Kafue- nasionale park en Livingstone.
12 GEHEIME VAN DIE KNYSNAWOUD
DATUMS Elke dag van die jaar buiten Kersfees (besprekings is noodsaaklik) PRYS R400 p.p (R200 vir studente; R100 vir o.10’s) – óf ry saam met ons teen R500 p.p. Die Knysnawoud... olifante, Italiaanse nedersetters, verdwaalde reisigers... Verken dié woud op ’n begeleide 4x4-selfrydagtoer.
13 SNEEU IN LESOTHO
DATUM 2-4 Augustus 2019 VERBLYF Lodge PRYS R3 950 p.p. (BTW uitgesluit)
In die laatwinter lê Lesotho onder ’n lieflike sneeukombers, en die hoogland is vol geyste watervalle. Bring jou gesin en jou 4x4 of nutsvoertuig vir ’n naweek van sneeu en avontuur. Ons bly die Vrydag- en Saterdagaand in ’n gastehuis op Ficksburg en bring die hele Saterdag in die bergkoninkryk deur – in die sneeu!
14 MOSAMBIEK
DATUM 8-17 September 2019 VERBLYF Tente en chalets PRYS R13 500 p.p. (BTW uitgesluit)
Dié sirkelroete neem ons van Punda Maria in die Krugerwildtuin oor Inhassoro op die tropiese kus van Mosambiek terug na die Giriyondo-grenspos en weer die Kruger in. Tussenin besoek ons die kus by Xai-Xai en gaan op ’n dag lange bootrit na Paradise Island naby Bazaruto – een van die hoogtepunte. Ons sal ook elke dag heerlike seekos geniet.