BOSBREKERS BESKERM ONS

Ek verwys na die bosbreker-artikel in die Junie-uitgawe en deel graag my mening. As ’n mens kyk na die toestande op ons paaie, sal ek dit ernstig oorweeg om ’n bosbreker op my Ford Ranger te installeer. Elke mens het die reg om sy eiendom te beskerm.

Vir my is ’n bosbreker iets wat skade op my voertuig sal verminder ingeval van ’n ongeluk.

Kyk ’n bietjie hoe lyk die paaie in Pongola se omgewing. Daar is nie heinings langs die paaie nie en diere loop vrylik rond. Dieselfde geld naby Klerksdorp. Op die N12 is daar weerskante van die pad geen heinings nie en beeste en bokke loop oor die pad.

Ook in die noorde van die land moet ’n mens baie versigtig wees op die pad. Daar is heelwat wildplase en reservate, en ’n koedoe spring lag-lag oor ’n hoë heining.

Hierdie toestande sien ’n mens byvoorbeeld nie in Europa nie. Daar is die grootste (lopende) gevaar voetgangers en dalk hier en daar ’n hond. Bosbrekers maak dus daar minder sin.

Die owerhede moet hulle deel doen en drade span sodat padgebruikers beskerm kan word. Dán kan iemand vinger wys en sê ek mag nie my voertuig met ’n bosbreker beskerm nie.

Rakende die raakry van ’n voetganger met ’n bosbreker: Hoekom moet ek meer skade ly sonder ’n bosbreker wanneer ek die wette op die pad gehoorsaam en ’n onverantwoordelike voetganger loop oor die pad?