Toyota en Suzuki staan saam
Toyota en Suzuki in Japan het ooreengekom om tegnologieë te deel. Die eerste stap behels dat Toyota ’n hiperdoeltreffende aandrywingstelsel aan Suzuki verskaf. In ruil hiervoor gaan Suzuki sakegeleenthede in Indië skep vir Toyota. Dit klink dalk vreemd dat Toyota Suzuki se hulp hier nodig het, maar Suzuki het ’n sterk teenwoordigheid in Indië en ’n lojale ondersteuningsnetwerk.
Voertuie wat deur Suzuki ontwerp is, sal deur Toyota Indië vervaardig word en as Toyotas én Suzukis verkoop en gediens word. Hierdie nuwe Toyota-Suzukis sal ook na ander markte uitgevoer word.
“Suzuki was een van die eerste Japannese motorvervaardigers in Indië, en saam met die burgers van Indië neem hulle dié land vorentoe,” sê Akio Toyoda, president van Toyota. “Toyota wil deel wees van dié ondernemingsgees.
“Ons kry ondersteuning met die ontwikkeling van ’n kompakte hiperdoeltreffende aandrywingstelsel – iets wat ons broodnodig het,” sê Osamu Suzuki, Suzuki se voorsitter. >