E-Pace kry nog blikbreinselle

Kort ná sy bekendstelling kry Jaguar se E-Pace nou kunsmatige intelligensie.

Dié kar kan glo die gedrag en voorkeure van sy eienaar aanleer – hy herken jou aan die sleutel en selfoonsein; as jy nader stap, verstel die E-Pace die sitplekke, temperatuur en radio nes jy daarvan hou.

Hy hou ook rekening met die tyd van die dag, dag van die week én watter seisoen dit is om te besluit of hy die sitplekverwarmer en nuuskanaal moet aanskakel, of die lugreëling en klassiekemusiekkanaal.

Die blikbrein sal ook leer dat jy geneig is om byvoorbeeld jou sekretaresse soggens en jou lewensmaat smiddae te bel, en wissel dan dié kontakbesonderhede af aan die bopunt van die kontaklys.