KAMPBOFFIN
Die handelsnaam Camp Cover het geen bekendstelling nodig nie. Onder kampeerders en 4x4-geesdriftiges is dit ’n gunsteling om hulle toerusting te beskerm. Ons besoek hulle fabriek in Blackheath, Kaapstad, om te sien hoe hulle sakke en beskermende oortreksels vervaardig word.
Die maatskappy het in 1991 sy deure geopen en aanvank- lik sagte koelsakke in hulle klein fabriek in Maitland ver- vaardig. Die Camp Cover-reeks soos ons hom vandag ken, het 20 jaar gelede die lig gesien en het dié familie-onder- neming in staat gestel om sy groter fabriek van 2 000 m² in Blackheath te bekom. Vandag het hulle nie minder nie as 80 mense in diens.
Die fabriek lewer gemiddeld 150-350 sakke per dag, afhangend van die item. Wanneer iets soos ’n gewone inkopiesak vervaardig word, kan tot 1 200 per dag geproduseer word, maar met ’n meer komplekse item lewer die fabriek 60 produkte per dag.
Die fabriek is aanpasbaar by markomstandighede en kan vinnig van koers verander. Gestel ’n produk vaar nie besonder goed op die winkelrak nie, kan hulle die fokus verskuif, ’n nuwe item ontwikkel en dit binne twee maande op die rak hê. Dit gee hulle ’n groot voordeel bo handelsname uit die Verre-Ooste, wat elke ses maande groot vrag- houers vol generiese items na Suid-Afrika verskeep.
Buiten die Camp Cover-reeks vervaardig die fabriek ook promo- sie- en korporatiewe items. Dié deel van die onderneming is nie net gemik op groter klante wat reusebestellings plaas nie, maar ook op Jan Alleman wat op soek is na verpersoonlikte items vir eie gebruik.
Selfs in vandag se moeilike ekonomiese klimaat kon Camp Cover daarin slaag om hulle volumes te verhoog. Dit is grootliks te danke aan hulle teenwoordigheid by buitelugskoue waar hulle direk met voornemende en huidige klante gesels. Hulle is gretig om na voorstelle te luister en het al ná gesprekke met mense wat hulle produkte elke dag gebruik, veranderinge aangebring.
Die Camp Cover-reeks bestaan op die oomblik uit 170 verskillende sakke, maar hulle probeer om minstens twee maal per jaar nuwe produkte te ontwikkel. Van hulle mees onlangse toevoegings sluit in sakke vir jaggewere en produkte wat gemik is op die groeiende fietsrymark in Suid-Afrika.
Camp Cover het ook begin om sy produkte na Australië en Europa uit te voer en dit wil voorkom of verbruikers daar ’n waardering vir Suid-Afrikaanse gehalte het. Soos dinge nou staan, gaan Camp Cover heel waarskynlik binne die volgende twee jaar meer as 200 verskillende sakke in hulle reeks hê.