Dankie vir die ekstra myl

Ons kamp al etlike jare by die Hartbeeshoek-reservaat naby Brits. Dié netjiese oord behoort aan Braam en Mimi Bothma en ons noem dit ook ons huis weg van die huis af.

Buiten hulle uitstekende plek spreek hulle klantediens ook boekdele. Dit was weer tyd vir ’n goeie ruskans by Hartbeeshoek, maar die aand voor ons ry, bel Mimi oor moontlike onrus by die nabygeleë Lethlabile. Sy sê sy sal ons op die hoogte hou.

Ons besluit om sommer vyfuur die oggend te ry sodat ons die moontlike moeilikheid kan vermy. Kort hierna kry ons ’n boodskap van Braam om te hoor of ons al in die pad geval het.

Tien minute later kry ons ’n oproep van ene Bennie Dercksen, ’n lid van ’n sekerheidsmaatskappy op Brits. As ons nader aan die dorp kom, sal hy ons tot by Hartbeeshoek vergesel.

Dinge was wel omgekrap en ons het verby smeulende bande en twee uitgebrande motorwrakke gery, maar nie vir ’n oomblik het ons bedreig gevoel nie. Bennie het hom kom voorstel en ons was baie dankbaar vir sy hulp. Min het ons geweet ’n besorgde Braam het vooraf reeds reëlings getref, en Bennie was al om 4 vm. gereed om ons te vergesel.

Ons is opreg dankbaar vir die diens, maar dis besorgdheid soos dié wat ons telkens na Hartbeeshoek sal laat terugkeer. Aan Braam, Mimi, Bennie en Deona Becker en Heinrich Horn van die oord: Julle is wonderlike mense.