Recce-raad vir Conqueror
Die boswavervaardiger Conqueror het die manne van Recce Incorporated (Edms.) Bpk. nader gehark vir verdere ontwikkeling van sy boswa en boswoonwaens. Thinus de Vries, Conqueror se besturende direkteur, sê hy is opgewonde oor die voortuitsig om hulle produkte nóg beter te maak.
SASMA is die amptelike ledeorganisasie vir die veterane van die Suid-Afrikaanse Spesiale Magte. Die organisasie se doelstelling is om veterane te ondersteun, en met dít in gedagte is Recce Inc. op die been gebring – om die Recce-handelsnaam vir kommersiële doeleindes aan te wend.
Callie Roos, uitvoerende hoof van Recce Inc., sê hulle het Conqueror as vennoot gekies vanweë die vervaardiger se trotse tradisie van gehalte én omdat hulle dieselfde eienskappe het.
Vir Conqueror is dit geen onbekende veld nie. Die maatskappy het in die jare negentig ontstaan as vervaardiger van militêre spesialistoerusting en bou sedert 1998 boswaens.
Intussen het Conqueror 20 robotte aangekoop om sy produksielyn nóg meer vaartbelyn te maak. Nou spog dié vervaardiger met een van die mees gevorderde produksielyne in die land, want die robotte kan onder meer materiale sweis, plate heen en weer skuif vir die pons-, lasersny- en buigmasjiene, en selfs stroke gom smeer en panele optel en aan mekaar vassit. Kontak 016 349 6531 info@ conqueror.co.za conqueror.co.za >