Soete verleiding
Gooi die karamelsous uit in ’n diep blikbord en laat almal hulle oliebolle daardeur trek soos dit uit die pot kom.
Jy benodig
(genoeg vir 8) 2 koppies koekmeel ¼ koppie suiker 1 teelepel bakpoeier ½ teelepel koeksoda ¼ koppie sonneblomolie 180 ml karringmelk 1 groot eier sonneblomolie vir diepbraai
VIR DIE KARAMELDOOPSOUS 1 blikkie (400 g) karamelkondensmelk (Caramel Treat) ½ koppie room ½ teelepel fyn kaneel
Só maak jy
1 Meng die meel, suiker, bakpoeier en koeksoda goed saam in ’n groot mengbak. Maak ’n holte in die middel. 2 Meng die olie, karringmelk en eier in ’n aparte bak saam. Gooi dit in die holte van die meelmengsel en roer stadig die droë bestanddele in. 3 Verhit genoeg olie in ’n pot om die oliebolle te diepbraai. Toets die hitte – as ’n klein broodblokkie dadelik dryf en borrel, maar nie te vinnig bruin braai nie, is dit reg. Skep lepels vol van die beslag in die warm olie en braai dit tot goudbruin en deurgaar. Moenie te veel op een slag braai nie, want dan koel die olie te veel af. Skep die oliebolle uit op kombuispapier sodat die oortollige olie geabsorbeer kan word. 4 Maak die karamelsous Verhit die karamel, room en kaneel saam en roer die mengsel tot dit mooi glad is. Sit dit voor as ’n sous waarin almal hulle oliebolle kan doop.
Weg Ry & Sleep sê Gesmelte sjokolade en room met ’n bietjie brandewyn daarby is ook ’n heerlike sous vir dié oliebolle. Óf meng pleks van die kaneel ’n eetlepel grondboontjiebotter deur die karamel!