Kanniedood
Die afgelope agt jaar het dié leser se sleepkombinasie geen probleme opgelewer nie.
Betroubare bielie
2007 TOYOTA HILUX 3.0 D-4D (DUBBELKAJUIT) Die vorige geslag Hilux was, net soos sy voorgangers, ’n reuse-sukses wat plaaslike verkope betref. Maar met die enorme groei in die marksegment vir dubbelkajuite het die mededinging al hoe taaier geraak. Jaco Dippenaar van Roodepoort het egter net goeie goed te sê oor sy 2007-model Hilux.
Toe ek in die mark was vir ’n dubbelkajuitbakkie, was daar heelwat keuses, maar baie van hulle het ernstige
turbo-traagheid gehad. Dit is iets wat my nie aanstaan nie. Ek het ’n ryding gesoek wat nie traag is nie – een met hope wringkrag. Uiteindelik het ek op ’n splinternuwe Hilux besluit en hy het my R267 000 uit die sak gejaag. Drie jaar later het ek ook vir my ’n Camp Master Wilderness-kampwaentjie gekoop.
Die een ding wat gepla het met die vroeër modelle was dat die voorste passasier nie ’n houer vir koeldrank of koffie gehad het nie. Die nuwer modelle het ook met ’n groter wiel-enbandkombinasie uitgekom.
Hoe ook al, ná tien jaar is dit steeds ’n uitstekende sleepvoertuig en dis relatief goedkoop om hom te onderhou.
Ek was betreklik tevrede met die Hilux, maar hy was effens kort van asem en daarom het ek besluit om vir hom ’n 3”-uitlaatstelsel, K&N-lugfilter en ’n Windbooster- elektroniese versnelbeheerstelsel aan te bring. Na dié modifikasies het die 3.0 D-4D ’n bietjie makliker asemgehaal – ek kon dit veral op die ooppad sien.
Ek sleep gewoonlik teen 100-110 km/h en doen dit moeiteloos danksy die modifikasies aan die Hilux. My gemiddelde brandstofverbruik met die wa op die haak is 10 ℓ/100 km, en wanneer ek nie sleep nie, gee hy 8 ℓ/100 km.
Ek het onlangs die geleentheid gehad om met ’n nuwer Toyota Fortuner te sleep, en ek het gedink dis ’n goeie alternatief vir my, maar hy het te veel gevoel soos my “ou” Hilux voor ek die modifikasies laat doen het. Die meeste mense raak gewoond aan die trae kraglewering, maar nie ek nie. Ons is gaande oor die ATKV-Eilandspa en probeer gereeld daar kamp. Dit voel soos ’n oase in die bosveld en daar is baie te doen vir die kinders én grootmense.