MIC SE RUBRIEK
Motorvervaardigers is as ’n reël vreeslik mededingend, maar hulle is ook slim genoeg om te besef samewerkingsooreenkomste kan groot voordele inhou, sê Mic van Zyl.
Onlangs kuier ek saam met ’n ou kennis. Ek het die ou donkiejare laas gesien en ons het mekaar by ’n Ierse kroeg gekry vir middagete. Dit was egter onvermydelik dat middagete sou oorspoel in ’n gekuier tot laatmiddag. Dit was heerlik om hom weer te sien en ons het deur die loop van die middag oor ’n hele paar dinge gesels.
In ’n stadium was die nuwe Mercedes-Benz-bakkie, die X-klas, onder bespreking en my vriend het voet by stuk gehou die Duitse vervaardiger het ’n groot flater begaan deur basies ’n Nissan Navara as ’n Merc te probeer verkoop. Hy is hoogs ontsteld dat Mercedes die vermetelheid het om te glo mense gaan dit sommer aanvaar. Ek moet ook noem my vriend is ’n groot Mercedes-aanhanger, met onder meer ’n CLK 63 AMG Black Series en ’n AMG SLS Black Series in sy motorhuis.
Ons gesprek laat my die volgende dag nadink, en hoewel my vriend sterk voel oor die saak, het ek ’n ander mening. Ja, motorvervaardigers is as ’n reël vreeslik mededingend, maar hulle is ook slim genoeg om te besef samewerkingsooreenkomste kan groot voordele inhou. Dié voordele geld ook vir kopers, selfs al voel hulle of hulle te na gekom is.
Samewerking onder motorvervaardigers is niks nuuts nie. Dit was net voorheen makliker om dit geheim te hou. Maar met die internet en sosiale media is niemand se geheime meer veilig nie. DAAR IS MINSTENS drie baie goeie redes hoekom vervaardigers saamwerk wat betref die ontwikkeling van hulle voertuie. Die eerste is om koste te bespaar. Dit is ontsaglik duur om voertuie te ontwikkel, en ’n mens moet altyd onthou jou kar se prys word nie net bepaal deur die koste van vervaardiging nie. Die geld wat vervaardigers op ontwikkeling, ingenieurswerk en toetse bestee, moet ook herwin word. Veiligheidsvoorskrifte en wetgewing wat verband hou met uitlaatgasse, raak boonop al hoe ingewikkelder, wat beteken ontwikkelingskoste styg deurlopend.
Wanneer twee mededingende motorververvaardigers dus kragte saamsnoer om ’n nuwe platform te ontwikkel, deel hulle dié kostes. Dit stel elke vervaardiger in staat om modelle met ’n kleiner produksiekoste te ontwikkel – iets wat nie moontlik sou wees as hulle dit alleen gedoen het nie.
Tweedens word vervaardigers gedwing om meer gereeld nuwe modelle bekend te stel. ’n Klompie jare terug het nuwe modelle minstens ’n dekade of meer basies onveranderd gebly, maar deesdae is dit net ’n jaar of drie. Deur saam te werk sny vervaardigers aan die tyd wat dit neem om ’n nuwe model te ontwikkel. Hulle doen dit met twee spanne wat agter mekaar op een platform werk en haal só grootskaalse tydbesparings.
Die derde rede is waarskynlik die interessantste, en die Merc X-klas is ’n uitstekende voor- beeld. Ja, die X-klas is gegrond op die Nissan D23 Navara, en as jy hulle langs mekaar trek, sien jy dadelik ’n klomp ooreenkomste. Maar klim in en ry die een en dan die ander, en jy sal die verskille duidelik sien.
BAKKIES IS DIE enigste voertuigsegment wat wêreldwyd groei. Die gewildste motors wat in Suid-Afrika, Australië, Thailand en Amerika verkoop word, is bakkies. Mercedes was dus in die kol met sy besluit om dié segment te betree. Deur Nissan te nader kon hy ’n bakkie neem wat hom reeds bewys het en dit omskep in iets meer Mercedes. Dit het aansienlik minder moeite, tyd en geld gekos as wat dit sou as hy met ’n skoon bladsy begin het. En hy het die gemoedsrus dat sy vennoot ’n ding of twee weet wanneer dit kom by die bou van ’n bakkie.
Ek glo die Duitsers het genoeg Mercedes by die Nissan-produk gevoeg om daardie driepuntster op die neus te regverdig. Enigiets meer sou dalk daartoe kon lei dat mense dit as ’n “sagte” bakkie beskou.
En dít is iets wat die Volkswagen Amarok sukkel om af te skud. Die tyd sal natuurlik leer.
Dit is ontsaglik duur om voertuie te ontwikkel, en ’n mens moet altyd onthou jou kar se prys word nie net bepaal deur die koste van vervaardiging nie.