NUWE RYGOED
Die Santa Fe is twee dekades al aan die voorpunt van Hyundai se sportnutsreeks. Die vierde geslag is pas bekend gestel en dit lyk of Hyundai alles in sy vermoë gedoen het om hom gemaklik te maak.
Die Dooiesee is ’n buitengewoon ekstreme plek. Dit is meer as 400 m ónder seespieël en die water is só sout dat niks daarin wil leef nie – nóg plant nóg dier. Die versengende hitte van die laatsomer pas perfek by die ongenaakbare landskap van Jordanië. Die kwik draai by 36 ºC terwyl Hyundai se bemarkingsmense die nuwe Santa Fe in die buitelug aan ’n groepie motorskrywers uit die Midde-Ooste en Afrika demonstreer.
Daar is ’n slaak van verligting wanneer die verrigtinge tot ’n einde kom en dit tyd raak om agter die stuurwiel in te skuif. Die vlees is swak en die groepie joernaliste stap sleepvoet deur die Mövenpick Dead Sea-oord se parkeerterrein terwyl emmers sweep hulle aftap. In teenstelling hiermee staan twee rye geparkeerde Santa Fe’s en luier sonder ’n druppel lugreëlingkondensasie op die plaveisel.
Koel kajuit
Dit is ’n verligting om ’n deur agter jou toe te trek nadat jy jou kleresak in die bagasieruim gelaai het en die outomatiese agterklap homself sluit. Die klimaat is klaar tot kamertemperatuur gestel, maar die beheerknop van die dubbelklimaatsone-lugreëling word haastig na links gedraai om die binneruim nóg koeler te maak. Jy kan ook jou sitvlak afkoel met versteekte waaiers in die sitplekke. Ná slegs ’n halwe minuut is jou lyding vergete en jy kan nou regop sit, jou oë oopmaak en die binneruim waardeer.
Iets wat dadelik die oog tref, is hoe ruim dit hier binne is. Luc Donckerwolke, hoof van Hyundai se ontwerpsentrum, het verduidelik hoe die langer asafstand, langer daklengte en breër bakwerk bygedra het tot die groter binneruim – veral vir die middelste en agterste passasiers.
Voorlangs word die bestuurder en passasier geskei deur ’n indrukwekkende middelkonsole wat spog met drie rye instrumente.
Hyundai se plan was om die Santa Fe so moeiteloos as moontlik te maak vir sy passasiers, en nêrens is dié pogings opsigteliker as agterlangs in die binneruim nie. Om by die derde ry sitplekke uit te kom hoef jy net ’n knoppie op die rugleuning van die middelsitplek te druk sodat dié sitplek vorentoe kan skuif. Die heel agterste passasiers het oorgenoeg beenruimte mits hulle nie langer as 1,7 m is nie.
Slegs ’n oliebrander
Verskeie enjinopsies is in ander lande beskikbaar, maar slegs een weergawe en ratkas kom na Suid-Afrika: Hyundai se 2,2 ℓ-turbodiesel en die nuutontwikkelde 8 spoedoutomatiese ratkas. Dis ook goed so, want dis die mees ekonomiese aandrywingstelsel in die Hyundai-stal.
Die enjin loop seepglad en dit blyk die Koreane sukkel nie met geraas en vibrasies nie.
Hyundai het besluit om sy eie 8 spoed- outomatiese ratkas te ontwikkel, en die eerste indruk is beslis goed. Hy’s in staat om die laaste rat in die verhouding te kies teen ’n lae 70 km/h mits toestande dit toelaat. Nie almal hou van ’n ratkas wat vroeg oorskakel nie, maar die voordeel hiervan is dat jy brandstof bespaar. Dit is goed en >
wel op ’n gelyk oppervlak, maar gooi ’n paar heuwels in die Santa Fe se pad en jy gaan voel hoe daai ratkas papperig raak. Jy kan natuurlik oorskakel na die sportmodus en self die ratte met die pedale agter die stuurwiel tokkel, maar dan gaan jy betaal by die vulstasie.
Maar selfs al ry jy oor lang afstande in die sportmodus gaan die Santa Fe steeds om en by 8 ℓ/100 km lewer, wat glad nie te versmaai is nie.
Wat kan jy nog verwag?
Die finale spesifikasielys vir Suid-Afrika is nog nie afgehandel nie. Daar is wel bevestig dat ons drie afwerkingsvlakke gaan kry: Premium, Executive en Elite. Die basis- en middelvlakmodel gaan voorwielaangedrewe wees (die enjin lê dwars onder die kap), terwyl die vlagskipmodel Hyundai se HTRAC-allewielaandrywing sal gebruik wat kragverspreiding outomaties behartig, tensy jy die verspreiding wil sluit sodat die voor- en agteras ewe veel krag kry – hiervoor sal daar ’n “Lock”-knoppie op die instrumentepaneel wees.
’n Raakskerm van 7 duim vir ’n mediasentrum sal ook standaard wees in al die Suid-Afrikaanse modelle. Die mediasentrum sal Bluetooth, Apple CarPlay- en Android Auto-programmatuur hê sodat jy jou slimfoon kan koppel.
Die middelvlakmodel sal ook LED-hoofligte, sleutellose toegang en ’n outomatiese luikrug hê terwyl die vlagskip sitplekke kry wat warm én koud maak. Die sitplekke sal jou boonop waarsku as ’n insittende sy sitplekgordel in die ry losmaak of ’n deur probeer oopmaak. ’n Alarm sal ook jou aandag trek as daar ’n voertuig in jou blindekol skuil.