’N KOMBI VIR DIE GRONDPAD!

’n Nuwe weergawe van SuidAfrika se gunstelingbussie, die Volkswagen Caravelle, is pas bekend gestel. In die PanAmericana word die gemak van die Caravelle gekombineer met Volkswagen se beproefde 4Motion-allewielaandrywing – amper soos in die Syncro van ouds.

Dié weergawe spog met onderstelbeskerming, klipbestande plastiekfilm oor die laer dele van die bakwerk en 17”-Devonport-allooiwielvellings. Maar buiten die praktiese dinge is daar ook kosmetiese verskille soos getinte ruite, getinte remligte, ’n chroomsierrooster en PanAmericana-logo’s teen die kante.

Die bussie is spesifiek vir grondpad ontwerp – moet net nie té wild raak nie, want die grondvryhoogte bly min of meer dieselfde. Vlekvryestaalpanele op die vloer gee nie bloot ’n rowwe voorkoms nie, maar dis ook glo opgewasse teen modderbesmeerde stapstewels en vuil bergfietse.

Die Caravelle PanAmericana word aangedryf deur Volkswagen se 2.0 BiTDI-4Motionenjin (132 kW) met ’n 7 spoedDSG-ratkas. Die enjin het ’n wringkragsyfer van 400 Nm teen 1 500 r.p.m. en versnel van 0 tot 100 km/h binne 12,1 s. Sy topspoed is 188 km/h.

Hoeveel gaan jy vir hierdie grondpad-Kombi betaal? Vir R955 400 is hy joune...