MY WIELE
Die meeste van die tyd sien jy ’n bakkie of sportnutsvoertuig voor ’n woonwa ingespan, maar dié twee lesers glo hulle rygoed is ewe tuis in die kampterrein.
Statige stasiewa
2015 VOLVO XC70 D5 As jy eers een keer met ’n Volvo gery het, sal jy nie maklik weer iets anders bestuur nie, sê Johannes Roux van Roodepoort. Hy het selfs sy ou XC70 vir ’n nuwer model ingeruil.
Ek het my 2009-model Volvo XC70
D5 ’n bietjie meer as vier jaar gelede gekoop, maar toe hy 180 000 km op die klok kry, het ek begin rondsoek na ’n nuwer ryding. Sy vermaakstelsel was ook ’n bietjie agter die tyd.
Ek het karre soos die Subaru Forester, Land Rover Discovery 4 en die Mazda CX-5 oorweeg, maar ek het eintlik maar altyd geweet die Volvo is voor in die ry wat betref ’n kombinasie van krag, ruimte, betroubaarheid en veiligheid. Hierdie faktore het basies die besluit vir my geneem en ek het ses maande terug ’n tweedehandse 2015-model XC70 met dieselfde enjin vir R300 000 gekoop.
Albei motors het my ontsettend beïndruk met hulle gehalte en hoe gemaklik hulle ry. Ek was ewe in my skik met die
diens by Volvo-handelaars. As ek kon, sou ek vir my die nuwe V90 Cross Country of ’n nuwe XC60 aanskaf.
My eie XC70 laat ’n mens selfversekerd voel op die pad danksy sy krag en gemak, en daar is nie veel wat ek aan hom sal verander nie, behalwe om ’n sleepstang aan te bring. Selfs wanneer hy volgelaai is met drie passasiers en die hele naweek se kamptoerusting, is daar min karre wat kan byhou op die ooppad. Dit is kinderspeletjies om stadiger verkeer met hom verby te steek.
Met my ou XC70 het ek selfs by Waenhuiskrans se strand op die sagte sand gery – en dit het omtrent die 4x4bestuurders se oë laat rek. Die brandstofverbruik styg tot
8,2 ℓ/100 km in die stadsverkeer, maar wanneer ons op die ooppad ry, daal dit soms tot laer as 6 ℓ/100 km.
Met die vorige XC70 het ons tot so ver as Waenhuiskrans gery. Ons het nog nie kans gehad om met die nuwe een weg te breek nie, maar ons het die Tanglewoodlandgoed by die Boskopdam buite
Potchefstroom onlangs besoek. Dis skoon, veilig en nommerpas vir ’n rustige hengelnaweek saam met die gesin.