KAMP & KATROL
As jy jou vlieghengeltegniek ’n bietjie wil slyp, is dit tyd om jou trommel en tent vir die skoon waters van Underberg in KwaZulu-Natal te pak.
SILVERSTREAMS-WOONWAPARK G’n grensgeval
Dié kampplek in die Drakensberg lê weggesteek feitlik teen die Boesmans nek grenspos na Lesotho. Dis nie moeilik om ’n puik kampplek te bedryf as jy sit met groot staanplekke op gras, langs ’n kristalhelder rivier met ’n prentjiemooi agtergrond nie. Voeg nou daarby ’n winkeltjie waar jy elke dag vars vleis, vrugte, eiers, sjokolade en rakmelk kan koop en jy het ’n juweel soos Silverstreams.
Die pad na die kampterrein van die kantoor af neem jou oor ’n smal betonbruggie oor die vlak Ngwangwanerivier.
Jy kan twee soorte forel hier vang: die reënboogforel of die bruinforel, maar vir laasgenoemde moet jy nie net Job se geduld hê nie, maar ook ’n goeie dosis vernuf én geluk.
Hier is agt staanplekke (op gras) langs die rivier en nog 24 nader aan die badkamers in die middel van die kamp, elk met ’n driepuntkragpunt. Party staanplekke het ’n eie braai (met ’n rooster), maar krane is skaars. En as jy koelte soek, moet jy maar die gazebo of strandsambreel saambring, want koeltebome is nie volop nie. Daar is darem ’n speletjieskamer vir die kinders as dit te warm word vir balskop of krieket teen die maats.