DUISENDE KAMP SAAM!
Ek en my vrou, Dina, besluit om weer ’n Kaapse draai te maak met ons Toyota Hilux KZTE en Sprite Splash. Ons ry eers die Woensdag by die kinders op Pretoria aan en die Vrydag plaas my seun Hennie ’n boodskap op Kamp-Mal se Facebookblad dat sy ouers, nou al ’n entjie in die tagtig, weer af Wes-Kaap se kant toe toer – mense kan uitkyk vir ons vir ’n geselsie of so.
En toe gebeur dit: Hordes boodskappe van welwillendheid begin instroom: “Voorspoed”, “Aangename reis”, “Geniet dit”, “Kom maak ’n draai by ons”, “Mooi ry”, “Bel hierdie nommer as julle hulp nodig kry”, “Laat weet hoe dit gaan”, “Watter pad ry julle?” en nog vele meer. Ons kry selfs ’n boodskap van Thys van Eck wat sê ons kan ons bakkie by sy Motolekwerkswinkel in Stikland laat nagaan. Teen die Vrydagaand laat was daar nie minder nie as 2 200 boodskappe op die webwerf. Baie dankie aan almal wat ons met soveel gemoedsrus op die pad laat gaan het.
Omdat ons reisplan taamlik vas was, kon ons nie al die uitnodigings aanvaar nie – maar steeds dankie en groete aan almal. Soos ons gevorder het, het ons daagliks navraag gedoen oor die paaie, en dan het ons op grond daarvan besluit waarlangs ons sou ry en kamp. Ons roete was hoofsaaklik met die N1 langs tot by Gariepdam en die Karoonasonale park, en dan na die Ou Skip-woonwapark op Melkbosstrand. Van hier af sou ons by die ander kinders in die Kaap ’n draai maak. Ons het vinnig vir Thys gaan groet terwyl hy die bakkie diens en heerlik oor die kamplewe gesels. Thys het ons nie ’n sent gevra nie.
Op pad terug huis toe het ons by Vanrhynsdorp gekamp, daarna by Springbok en weer by die Gariepdam. Meiringskloof was volgende, en toe Golden Gate en Drakensville. Op Ermelo gaan sê ons hallo vir sus Bets en Andrew Fraser en keer oor Badplaas huiswaarts.
Die toer was 6 200 km en ons was 40 dae op die pad. Die 3.0 KZTE se odometerlesing staan nou op 267 000 km en alles het klopdisselboom verloop. Omdat die Splash ’n gerieflike buitekombuis het, slaan ek en Dina slegs die tent op as ons langer as drie dae op een plek staan.