Goeie nuus vir die naarbrigade
In die nabye toekoms gaan jou motor jou waarsku reisnaarheid is besig om jou beet te pak – nog vóór jy naar raak! Dan gaan hy boonop stappe doen om jou te laat beter voel. Só sê die witjasse by Jaguar Land Rover.
Volgens Spencer Salter, welstandtegnologienavorser (ja, daar is so ’n beroep) by Jaguar Land Rover, ly 70% van mense aan reisnaarheid, maar tot onlangs toe was baie min inligting beskikbaar oor die oorsake en behandeling daarvan. Jaguar Land Rover het egter ’n deurbraak gemaak en biometriese sensors ontwikkel wat die gedrag van motoriste monitor en dan ’n algoritme gebruik wat voorspel of ’n passasier gaan naar word.
Oor die algemeen word aanvaar dat reisnaarheid veroorsaak word deur teenstrydige inligting wat deur die binneoor, vel en spiere na die brein gestuur word. Die verwarring veroorsaak dan naarheid, en dis veral algemeen as passasiers ’n boek lees in ’n bewegende voertuig.
Presies hóé die stelsel gaan werk, is nog nie duidelik nie, maar die posisie van die sitplekke, vibrasies in die kajuit en subtiele klankverstellings gaan deel vorm van die oplossing.
Ander motorvervaardigers soos Ford is lankal besig met navorsing in hierdie veld. Die Ford-navorsingsentrum in Duitsland het met reissiekspesialiste uit Noorweë saamgespan om die presiese oorsaak van dié kwaal op te spoor. Die meeste van hulle bevindings is geen verrassing nie: Dinge soos ’n onegalige spoed, kronkelpaaie en wáár in die voertuig jy sit, het ’n beduidende invloed. Hulle het ook bevind dat babas nooit karsiek word nie (dit begin eers wanneer hulle kan loop), en dat veral goudvisse vatbaar is...
Die kans van passasiers op die agtersitpek om reissiek te raak is aansienlik meer as dié van die voorste insittendes. Hulle beaam ook dat boererate soos gemmer of suikerdrankies dit beveg.
Dan is daar die ongewilde mening van prof. Jelte Bos, wat aan Ford se navorsing deelgeneem het: Hy beweer baie kinders word siek oor hulle ouers se bestuurstyl: Ry eerder beter, sê hy, sodat hulle nie naar raak nie – dan bespaar jy boonop brandstof.