Watter een is dus die beste?
As jy bloot jou kampgoed droog en veilig wil hou, is ’n glasveselkappie ’n uitstekende keuse. Die betreklik lae gewig en vaartbelynde profiel gaan jou laat glimlag by die vulstasie. Ons stel nie een voor vir ’n ekspedisie deur Afrika nie, maar vir langnaweke by ’n ATKV-oord is hy 100%. As jy ’n kappie soek wat feitlik ondeurdringbaar is teen boewe en saam met jou bakkie aftreeouderdom sal bereik, stel ons voor jy belê in ’n metaalkappie – staal of aluminium, nes jy wil. Die veelsydigheid van metaalkappies is lofwaardig, maar soek een wat die balans tref tussen duursaamheid en ’n lae gewig. Jy wil nie gebuk gaan onder ’n kappie vóórdat jou kamptoerusting ingelaai is nie.
As gewig van kardinale belang is, moet jy beslis ’n seilkappie oorweeg. En hy hoef nie ’n diefstalrisiko te wees as jy die regte soort raam gebruik nie. Die enigste beslommernis is dat jy hom elke keer versigtig moet toemaak, want anders gaan hy stof vergaar.