METAAL
Metaalkappies, veral aluminium, word al hoe gewilder onder die veldrygemeenskap. Een van die argumente in die aluminiumkamp is dat dit min weeg, maar dis meermale swaarder as glasvesel – en beslis swaarder as ’n seilkappie. Waar lê die voordele dan?
Ons het ’n paar vrae gestel aan Neel Britz, bestuurder van 4x4 Mega World in Kaapstad. Dié handelaar verkoop onder meer ARB-plastiekkappies, AluCabaluminiumkappies en RSIvlekvryestaalkappies. Waarom metaal? “Vaartbelynde glasveselkappies is ongetwyfeld mooi, en daar sal altyd ’n mark wees vir hulle,” sê Neel. “Maar daai vaartbelynde voorkoms tel teen hom as dit by ’n dakrak of daktent kom. Dan soek jy eerder ’n hoekige struktuur met ’n lang dakoppervlak sodat die monteerpunte die mininum spanning op die kappie se materiale plaas.
“RSI-kappies word van 3CR12staal gemaak, en die nate waar twee panele bymekaarkom, is
met knoopplate, epoksi en boute geheg. Dit skakel dus die kans uit dat krake sal vorm. Omdat RSI-kappies van staal gemaak word, kan enige ou met ’n sweismasjien noodherstelwerk daarop uitvoer. En jy kan maklik bybehore soos seilafdakkies aan die buitekant en rakke aan die binnekant vasbout.”
Maar wat van die ekstra gewig?
“In ruil vir die ekstra paar kilogram wat jy moet saamdra, kry jy ongeëwenaarde duursaamheid,” sê Neel. “Ek moet ook noem dat die gehalte van ’n kappie nie gemeet moet word op die totale gewig wat direk van bo af op die kappie kan druk nie, maar eerder aan die kappie se vermoë om gewig wat sywaarts beweeg – soos wanneer ’n veldvoertuig heen en weer wieg – te kan hanteer.
“Die totale dravermoë van ’n kappie is ’n bysaak. Jy moet in elk geval nooit meer gewig op die dak laai as wat die voertuigvervaardiger aanbeveel nie.”