SLEEPTOETS
Ná 20 jaar is Isuzu terug in die sportnutsmark. Ons haak ’n woonwa om te sien hoe sy nuwe sikspens, die mu-X, vaar.
Die mu-X is Isuzu se enigste sportnuts op ons paaie en volg in die voetspore van die destydse Isuzu Frontier. Dié model het in Japan bekend gestaan as die Isuzu MU, oftewel “Mysterious Utility”. Vandag kan jy kies uit twee modelle van die mu-X, albei met ’n 3 ℓ-dieselenjin en outomatiese ratkas. Dis net die aandrywing wat die twee modelle van mekaar onderskei – ’n 4x4, soos ons toetsvoertuig, en ’n 4x2, wat jou R62 000 minder uit die sak gaan jaag.
Hy lyk so groot...
Ja, die mu-X is ’n groot ryding – dit voel omtrent of hy in die geselskap van Toyota se Prado hoort. Binne is die mu-X verstommend ruim, veral agterlangs. Hier slaan selfs twee ekstra sitplekke op in die laairuim vir sewe sitplekke.
Die noodwiel is ’n volgrootte sierwiel en word, soos met
bakkies, onder die motor tot teen die romp gehys. Onder die laairuim se vloer is ’n plat kas met ’n opligdeksel en drie kompartemente. Die kas strek oor die breedte van die laairuim, is 11 cm diep en is ’n nuttige bêreruimte vir ’n klein noodhulptassie of ander waardevolle items wat jy buite sig wil hou. Sit sommer byvoorbaat een van daardie blou Fredlin-proppe vir die woonwa in die kas... dis iets wat ’n mens mos maklik vergeet. (Ons praat hier uit ondervinding. – Red.)
Beskeie bielie
Die haak kan beswaarlik stewiger. Die grootste deel sit mooi weggesteek agter die buffer – hy krom om die noodwiel en die bolgedeelte pas netjies by die onderkant van die buffer (dit belemmer ook nie die mu-X se vertrekhoek te erg as jy ’n steilte op ’n 4x4-hindernisbaan moet pak nie). Boonop kan jy die bolgedeelte losmaak as jy dalk ’n sakplaat wil gebruik.
Die stang word deur Brink Towing Systems gebou en is gesertifiseer vir ’n sleepvrag van 2 965 kg. Dis in lyn met wat Isuzu toelaat – op die stang se plaatjie staan selfs jou wa se BVM mag nie swaarder as 2 965 kg wees nie. Gewoonlik verskyn die D-waarde – dit verwys na ’n spesifieke vragtoets – op Brink se stange, maar Brett Zietsman van dié maatskappy sê Isuzu het hulle genader om eerder die BVM as die D-waarde aan te bring. Die neusgewig mag nie 100 kg oorskry nie. >
Die stang word deur Brink Towing Systems gebou en is gesertifiseer vir ’n sleepvrag van 2 965 kg.
Kom gerus binne
Al het hy soveel ruimte, is die mu-X binnelangs effens eenvoudig. Die paneel lyk plastiekerig, maar daar is darem leerbekleedsel oor die boonste paneelkissie.
Die truskerm lyk verdwaal op die enorme middelpaneel en die beeld is skaars 14 cm breed en 7,5 cm hoog. Die skerm se indekslyne is staties en verstel nie soos jy die stuur draai terwyl jy terugstoot nie. Jy kan darem die bol op die skerm sien – mooi in die middel van jou beeld.
Die rekenaar herken nie ’n woowna op die haak nie en die trusensors raas wanneer jy met die wa terugstoot. Ons kon nêrens ’n knoppie vind wat die alarm afskakel nie.
Voor die rathefboom, in die paneel onder die lugreëlingknoppie, is drie USB-sokke. Elkeen het ’n klappie met ’n gleufie aan die bokant wat jy met jou nael moet haak om oop te maak, maar dis moeilik om jou vinger daar te kry, want die paneel van die lugreëling loop tot teenaan die klappies. By die agtersitplek is een USB-punt met ’n soortgelyke kappie, maar dié is oop en ’n mens sukkel nie.
Die passasiers op die agtersitplek is ook nie uitgelewer aan die voorkeure van die bestuurder as dit kom by die verstellings van die lugreëling nie. In die dak is ’n knop waarmee die passasiers self kan stel hoe hulle die lugreëling wil hê (bo albei kantsitplekke is ’n lugopening in die dak). Bo die opslaansitplekke in die laairuim is nóg twee lugopeninge.